У міліцыю звярнулася мінчанка, у якой зніклі сямейныя зберажэнні, а таксама залатыя і сярэбраныя ўпрыгожванні. Жанчына расказала, што яе сям’я прытуліла мужчыну, які прыехаў у сталіцу шукаць працу. Узамен ён паабяцаў дапамагчы з рамонтам. 

Калі гаспадары сышлі па справах, госць знайшоў у шафе шкатулку з замежнай валютай і ўпрыгожваннямі і забраў усё. Сысці адразу не атрымалася — вярнулася гаспадыня і папрасіла дапамагчы забраць маці з бальніцы. Мужчына пагадзіўся, але як толькі жанчына з’ехала ў медустанову, непрыкметна схаваўся. 

Аператыўнікі крымінальнага вышуку ўстанавілі, што да крадзяжу датычны 54-гадовы жыхар Гродна. Выкрадзеныя грошы ён выдаткаваў на алкаголь, таксі, адзенне і арэнду нумара ў хостэле.

У дачыненні да яго ўзбуджаная крымінальная справа па факце крадзяжу.