Сышчыкі Ленінскага РУУС па падазрэнні ў здзяйсненні крадзяжу затрымалі 53-гадовага будаўніка сталічнай арганізацыі.

Па словах старшага інспектара ГІГС Ленінскага РУУС Таццяны Кавалёвай, міліцыяй устаноўлена, што мужчына на працягу месяца здзяйсняў крадзяжы з будаўнічых магазінаў на тэрыторыі сталіцы. Фігурант мяняў штрыхкоды: з рабочых пальчатак пераклейваў іх на дарагія тавары і сканіраваў на касе самаабслугоўвання.

Са слоў мінчаніна, ён вырашыўся на супрацьзаконныя ўчынкі, бо ўсе наяўныя дома грошы патраціў на адпачынак жонкі і дзяцей. Будаўнічыя інструменты прадаваў на вядомай гандлёвай інтэрнэт-пляцоўцы.

На гэты момант сума ўрону складае больш за 2000 рублёў. Устанаўліваецца дачыненне мінчаніна да аналагічных злачынстваў у сталіцы.

Распачата крымінальная справа за крадзеж.