У маі гэтага года да мінчаніна прыехалі сябар дзяцінства, прыяцель і сяброўка. Падчас сустрэчы ўсе яны пілі алкаголь. Бліжэй да ночы дзяўчына паехала дадому, а маладыя людзі накіраваліся да знаёмага. Там яны выкурылі некалькі цыгарэт з гашышам. У нейкі момант адзін з хлопцаў адышоў і паклікаў за сабой 19-гадовага прыяцеля. Праз некалькі хвілін пачуліся крыкі. Яшчэ праз некалькі імгненняў гэты 19-гадовы хлопец убег назад у пакой, усе ўбачылі ў яго шматлікія парэзы на руцэ. Следам увайшоў і другі хлапец, у яго быў нож, з якім ён зноў хацеў напасці на пацярпелага. Тады адзін з тых, хто знаходзіўся ў кватэры, таксама 19-гадовы, кінуўся да нападніка і паспрабаваў адабраць у таго халодную зброю, але атрымаў ёю ўдар у руку, а потым — у спіну. Пакуль яны змагаліся, гаспадар кватэры здолеў выхапіць нож. Але абяззброены госць працягнуў біць другога параненага рукамі і нагамі. Сумеснымі намаганнямі яго ўдалося спыніць. 

Абмяркоўваючы далейшыя дзеянні, маладыя людзі не адразу заўважылі, як агрэсіўна настроены прыяцель падбег да акна, адкрыў яго і паспрабаваў выскачыць з 20 паверха. У апошні момант яго паспелі схапіць за ногі і зацягнуць у кватэру. 

У хуткім часе завадатар панажоўшчыны накіраваўся дадому, а параненыя — у траўмапункт. Яны не хацелі звяртацца ў праваахоўныя органы і расказалі медыцынскім работнікам, што парэзаліся аб шкло. Аднак, распазнаўшы нажавыя раненні, урачы паведамілі пра іх у міліцыю.

Следчым з прыцягненнем спецыялістаў УДКСЭ па горадзе Мінску праведзены агляд месца здарэння, канфіскаваныя прадметы, якія маюць дачыненне да крывавай бойкі. Была прызначана экспертыза.

Неўзабаве нападніка затрымалі супрацоўнікі крымінальнага вышуку. Падчас расследавання дапытаныя пацярпелыя, сведкі і абвінавачаны. Далучаны матэрыял, які характарызуе асобу, запісы камер відэаназірання, а таксама шэраг экспертных заключэнняў.

19-гадоваму мінчаніну нанесены раненні, якія адносяцца да цяжкіх цялесных пашкоджанняў. У дачыненні да абвінавачанага праведзена судова-псіхіятрычная экспертыза. Згодна з яе заключэннем, у момант здзяйснення злачынства фігурант мог у поўнай меры ўсведамляць фактычны характар сваіх дзеянняў і кіраваць імі. Ён прызнаў віну ў поўным аб’ёме і чыстасардэчна раскаяўся.

На падставе сабраных доказаў 20-гадоваму жыхару Мінска, які напаў з нажом на сваіх прыяцеляў, прад’яўлена абвінавачванне па ч. 1 арт. 147 (наўмыснае нанясенне цяжкага цялеснага пашкоджання) КК. З санкцыі пракурора да яго прыменена мера стрымання ў выглядзе заключэння пад варту.