Пра гэта заявіў першы намеснік міністра эканомікі Іван Вежнавец на пасяджэнні экспертна-кансультатыўнага савета пры Савеце Рэспублікі пад кіраўніцтвам спікера верхняй палаты парламента Наталлі Качанавай, паведамілі ў прэс-службе эканамічнага ведамства.
Паводле слоў першага намесніка міністра, у Беларусі сфарміравана дзейсная сістэма падтрымкі вытворчага бізнесу: ад ільгот і прэферэнцый да даступнага фінансавання. Гэта дазваляе мадэрнізаваць дзеючыя прадпрыемствы і запускаць новыя, ствараць працоўныя месцы, умацоўваючы эканамічную ўстойлівасць рэгіёнаў.
— Рэалізацыя ініцыятывы кіраўніка дзяржавы «Адзін раён — адзін праект» ужо прынесла адчувальныя вынікі: завершаны 91 праект у 79 раёнах, створана 4,3 тысячы працоўных месцаў, — паведаміў Іван Вежнавец.
Паводле яго слоў, да канца года плануецца рэалізаваць яшчэ каля 60 праектаў, што дасць дадаткова 2,6 тысячы працоўных месцаў.
— Астатнія — наш стратэгічны рэзерв на наступную пяцігодку, — адзначыў спікер.
Таксама ён расказаў аб запуску новай «Рэгіянальнай ініцыятывы»:
— Ужо сфарміраваны партфель з 70 праектаў на суму звыш 500 мільёнаў рублёў. Сёння мы актыўна працуем над паляпшэннем умоў фінансавання бізнес-ідэй, якія ўдзельнічаюць у гэтай ініцыятыве. Таксама ў наступным годзе плануецца запуск трох новых крэдытных прадуктаў, накіраваных на выкананне задач пяцігодкі: «Моцныя рэгіёны», «Тэхналагічная самадастатковасць» і «Турыстычны патэнцыял».
Першы намеснік кіраўніка эканамічнага ведамства таксама нагадаў, што абноўлены Закон «Аб інвестыцыях» прапануе гнуткія механізмы падтрымкі.
— Для буйных праектаў — інвестыцыйныя і спецыяльныя інвестдагаворы з пашыраным пакетам ільгот і магчымасцю дзяржзакупкі прадукцыі. Ужо заключана тры такія дагаворы на суму 2,6 мільярда рублёў, — прывёў лічбы ён. — Для рэгіянальных ініцыятыў — базавы пакет ільгот у рамках прэферэнцыйнага інвестпраекта. Рэгіянальнымі ўладамі прынята 19 рашэнняў на агульную суму каля 1,2 мільярда рублёў.
Іван Вежнавец звярнуў увагу на асаблівыя ўмовы — для інавацыйных праектаў з высокім патэнцыялам імпартазамяшчэння і накіраваных на забеспячэнне тэхналагічнай бяспекі.
Акрамя гэтага, нагадаў ён, у краіне эфектыўна працуюць і іншыя прэферэнцыйныя рэжымы: у СЭЗ, індустрыяльным парку «Вялікі камень», ПВТ і тэхнапарках.
— Усе гэтыя меры — не проста падтрымка бізнесу. Гэта інвестыцыі ў будучыню рэгіёнаў і краіны ў цэлым, — рэзюмаваў Іван Вежнавец.
