Кіраўнік Мінэнерга расказаў пра бягучы этап работы па стварэнні пункта захавання радыеактыўных адходаў. На сёння будаўніцтва такога аб’екта ў Хойніках не вядзецца. Цяпер Беларусь знаходзіцца на стадыі падрыхтоўкі да грамадскіх абмеркаванняў. Па выніках праведзеных даследаванняў вызначаны тры найбольш перспектыўныя пляцоўкі — у Гродзенскай, Магілёўскай і Гомельскай абласцях.

Для кожнай пляцоўкі распрацоўваецца перадпраектная дакументацыя, якая дасць магчымасць правесці комплексную крытэрыяльную ацэнку і вызначыць найбольш прыярытэтны варыянт.

Пры выбары пляцоўкі будуць улічвацца геалагічныя і бар’ерныя параметры, сацыяльныя і кадравыя магчымасці рэгіёна, эканамічныя фактары, а таксама меркаванне грамадскасці.

«Пункт захавання радыеактыўных адходаў — гэта аб’ект, які ствараецца на стагоддзі. Таму кожны крок павінен быць максімальна вывераным, а бяспека — безумоўным прыярытэтам», — падкрэсліў міністр энергетыкі.