Top.Mail.Ru

Мінімальны памер маёмасці для стварэння фондаў у сферы аховы здароўя павялічаны ўдвая: у Міністэрстве юстыцыі растлумачылі прычыну

Мінімальны памер маёмасці, неабходнай для стварэння і дзейнасці фондаў у сферы аховы здароўя, павялічаны ўдвая. Гэта дазволіць выключыць трапленне ў гэту сферу дзейнасці несумленных суб’ектаў, паведаміў БелТА намеснік начальніка ўпраўлення па пытаннях некамерцыйных арганізацый Міністэрства юстыцыі Аляксей Печкароў.

«Дзейнасць фондаў у сферы аховы здароўя звязана з высокімі рызыкамі і вялікімі фінансавымі сродкамі. Таму ўказам № 304 павялічаны ўдвая мінімальны памер, неабходны для стварэння і дзейнасці фондаў у сферы аховы здароўя», — сказаў Аляксей Печкароў.

Па агульным правіле для мясцовых фондаў мінімальны памер складае 100 базавых велічынь, а для мясцовых фондаў у сферы аховы здароўя — 200 базавых велічынь, або 9 тыс. рублёў. Аналагавая сітуацыя і для рэспубліканскіх ды міжнародных фондаў. Калі ў цэлым для іх стварэння і дзейнасці мінімальны памер маёмасці складае 1 тыс. базавых велічынь, то для фондаў у сферы аховы здароўя міжнароднага або рэспубліканскага ўзроўню — 2 тыс. базавых велічынь, што складае 90 тыс. рублёў. 

Паводле слоў намесніка начальніка ўпраўлення, такая норма ўведзена для таго, каб у гэту сферу фізічныя і юрыдычныя асобы не заходзілі спантанна. Тут павінны працаваць толькі тыя суб’екты, якія па сваім фінансавым становішчы змогуць надалей весці адпаведную дзейнасць у вызначаных законам межах. 

Аляксей Печкароў паведаміў, што паводле гэтага ж указа Міністэрства юстыцыі і галоўныя ўпраўленні юстыцыі пры разглядзе дакументаў аб дзяржаўнай рэгістрацыі фондаў запытваюць і атрымліваюць неабходныя звесткі, якія маюць значэнне для прыняцця рашэння аб дзяржрэгістрацыі. Гэта таксама дазваляе выключыць уваходжанне ў сферу дзейнасці несумленных суб’ектаў.

Больш за тое, указам № 304 прадугледжана павелічэнне перыяду часу з трох да пяці гадоў, на працягу якога забараняецца дзяржаўная рэгістрацыя фондаў у сферы аховы здароўя ў выпадку, калі іх заснавальнікі з’яўляліся заснавальнікамі або членамі органаў фондаў ці членамі кіруючых органаў грамадскіх аб’яднанняў (партый), ліквідаваных у судовым парадку за парушэнне заканадаўства. У распараджэнні Міністэрства юстыцыі ёсць звесткі пра фізічных асоб.

На інтэрнэт-партале Міністэрства юстыцыі ёсць пералік грамадскіх аб’яднанняў і фондаў, якія займаюцца дабрачыннай дзейнасцю, а таксама тых, якія займаюцца сацыяльнай дзейнасцю і рэалізуюць патрыятычныя праекты. Там жа маюцца гіперспасылкі на сайты адпаведных фондаў, па якіх можна азнаёміцца з неабходнай інфармацыяй.

Акрамя таго, на сайтах Міністэрства юстыцыі, а таксама галоўных упраўленняў юстыцыі аблвыканкамаў і Мінгарвыканкама размешчаны звесткі, якія прадастаўляюць усе фонды і грамадскія аб’яднанні незалежна ад таго, займаюцца яны дабрачыннай дзейнасцю ці не. Любы грамадзянін, які хоча аказаць дапамогу або супрацоўнічаць з якім-небудзь фондам, можа зайсці на сайты рэгіструючых органаў і паглядзець інфармацыю пра такі фонд, пра атрыманыя грашовыя сродкі, іншую маёмасць за мінулы год і выдаткаванне сродкаў.

arrow
Нашы выданні

Толькі самае цікавае — па-беларуску!

Напішыце ў рэдакцыю