У краіне адзначаецца чаканае сезоннае павелічэнне колькасці хворых на вострыя рэспіраторныя інфекцыі (ВРІ). Але ў цэлым захваральнасць знаходзіцца ў межах сярэдніх шматгадовых паказчыкаў захваральнасці.

Паводле даных лабараторнага маніторынгу, устаноўлена пераважная цыркуляцыя негрыпозных рэспіраторных вірусаў — адэнавірусы, рынавірусы, РС-вірусы і вірусы парагрыпу. «Разам з тым адзначаны адзінкавыя выпадкі грыпу А (у тым ліку A (H1N1) і A (H3N2) у непрышчэпленых пацыентаў. Гэта сведчыць аб пачатку цыркуляцыі вірусаў грыпу сярод насельніцтва краіны», — паведамілі ў Міністэрстве аховы здароўя.

Кампанія вакцынацыі супраць грыпу прадаўжаецца. Ужо вакцынаваліся больш за 1 млн чалавек. У першую чаргу вакцынацыя патрэбна слабаабароненым групам дзяцей і дарослых. Яна дасць магчымасць засцерагчы ад захворвання і цяжкіх ускладненняў.