Аднак спецыялісты папярэджваюць, што з надыходам восені чакаецца заканамерны пад'ём захваральнасці на ВРІ. Ён будзе звязаны і са змяненнем умоў надвор’я, і з пачаткам навучальнага працэсу ва ўстановах адукацыі, і ў сувязі з завяршэннем адпускной кампаніі. Традыцыйна ў кастрычніку пачынаецца сезон павелічэння захваральнасці на ВРІ, грып і COVID-19. А пік росту захваральнасці, асацыяванай з вірусамі грыпу, можна чакаць у канцы студзеня-лютым.

Верасень-лістапад — ідэальны час для правядзення вакцынацыі. Традыцыйна ў гэты перыяд Міністэрства аховы здароўя рэкамендуе запланаваць вакцынацыю, асабліва дзецям і дарослым, схільным да рызыкі заражэння і развіцця цяжкіх ускладненняў пасля перанесеных інфекцый — з хранічнымі захворваннямі, імунадэфіцытамі, асобам, старэйшым за 60 гадоў, і іншым.

З мэтай зніжэння частаты развіцця ўскладненняў пасля перанесенай інфекцыі спецыялісты рэкамендуюць выконваць меры прафілактыкі і беражліва ставіцца да свайго здароўя. Правілы, знаёмыя з дзяцінства, дзейнічаюць і цяпер: мыць рукі, пры дрэнным самаадчуванні — заставацца дома і сачыць за сімптомамі. Рэгулярна праветрываць памяшканне і праводзіць вільготную прыборку. Пры неабходнасці звяртацца да ўрача.

Лета і пачатак восені асацыюецца не толькі з цяплом і адпачынкам, але і з ростам захваральнасці на вострыя кішэчныя інфекцыі. Бягучы перыяд адрозніваецца прыростам на 22 % інфекцый, выкліканых вірусамі — норавірусамі, ротавірусамі, энтэравірусамі і іншымі. Захваральнасць фарміруецца за кошт выпадкаў энтэравіруснай інфекцыі сярод дзяцей, якія вяртаюцца з адпачынку з такіх краін, як Турцыя, Егіпет. Дарослыя павінны нагадваць дзецям пра неабходнасць дбайнага прамывання гародніны і садавіны і захавання правілаў асабістай гігіены.

Сітуацыя па захваральнасці на адзёр у краіне кантраляваная. З усіх зарэгістраваных выпадкаў адру за мінулы перыяд года каля 70 % выпадкаў з’яўляюцца завознымі. У асноўным хварэюць дарослыя, якія не былі прышчэплены супраць адру. Рэгіструюцца выпадкі адру ў дзяцей, не прышчэпленых па прычыне адмовы бацькоў ад вакцынацыі. У сувязі з гэтым Міністэрства аховы здароўя яшчэ раз нагадвае: прышчэпачныя кабінеты адкрытыя для грамадзян - варта прыйсці на прафілактычную вакцынацыю.

• У гэтым сезоне рэгіструецца нізкі ўзровень захворвання COVID-19. Каб выжыць, кожны вірус працягвае эвалюцыянаваць, набывае свае асаблівыя ўласцівасці. У свеце ў студзені 2025 года ўпершыню быў выяўлены новы варыянт каранавіруса «Стратус» — нашчадак варыянта «Амікрон». Ён вызначаецца высокай заразнасцю, але не выклікае больш цяжкага цячэння хваробы ў параўнанні з папярэднімі варыянтамі. Характэрная прыкмета захворвання — змяненне голасу, ахрыпласць або асіпласць. У Беларусі падчас маніторынгу новы штам віруса XFG Stratus не выяўлены.

У Мінздраве таксама адзначылі, што ў сувязі з пашырэннем спектра турыстычных паслуг, якія прапануюць беларускія тураператары, у краіны Усходняга Міжземнамор’я, Паўднёва-Усходняй Азіі, Паўднёвай Амерыкі, інфекцыяністы штогод рэгіструюць завозныя выпадкі ліхаманкі дэнге, малярыі і г. д. Застаецца рызыка завозу шэрагу небяспечных захворванняў, якія на працягу доўгага часу не рэгістраваліся ў Беларусі: халеры, поліяміеліту, брушнога тыфу. Міністэрства аховы здароўя заклікае выконваць меры бяспекі, каб не заразіцца птушыным грыпам або ліхаманкай чыкунгунья, пры выездзе ў такія краіны, як Егіпет, Кітай, В’етнам, Індыя, Тайланд, Інданезія і іншыя. У Беларусі падчас маніторынгу выпадкі захворвання ліхаманкай чыкунгунья не зарэгістраваны.

Калі пасля прыезду з краін Усходняга Міжземнамор’я ці Паўднёва-Усходняй Азіі вы адчулі сябе дрэнна, абавязкова звярніцеся да ўрача. «Не займайцеся самалячэннем. Установы аховы здароўя краіны маюць усё неабходнае для дыягностыкі і лячэння захворванняў», — адзначылі ў Міністэрстве аховы здароўя.

Пры выездзе за мяжу варта азнаёміцца з эпідэміялагічнай сітуацыяй па інфекцыях у свеце і мерах іх прафілактыкі, у тым ліку патрабаваннях па вакцынацыі на афіцыйным сайце Міністэрства аховы здароўя.