Міністэрства абароны Беларусі адзначае беспрэцэдэнтную мілітарызацыю па перыметры краіны. Пра гэта заявіў міністр абароны Беларусі Віктар Хрэнін журналістам па выніках зацвярджэння Прэзідэнтам Беларусі Аляксандрам Лукашэнкам рашэнняў на ахову дзяржаўнай граніцы ў 2026 годзе, перадае БелТА.
«Ідзе развіццё і мілітарызацыя сіл і сродкаў у еўрапейскіх краінах. Мы бачым беспрэцэдэнтную мілітарызацыю, агрэсіўныя выпады і намеры ў дачыненні да нашай краіны, якія працягваюцца», — сказаў кіраўнік Мінабароны.
Віктар Хрэнін таксама канстатаваў наяўнасць фактаў парушэння граніц у паветранай прасторы.
«У еўрапейскіх краінах дыслакуецца групоўка розных авіяцыйных сродкаў. Гэта больш за 2,2 тыс. самалётаў. Групоўка ў Польшчы і краінах Балтыі дасягае 130, летась даходзіла да 140 самалётаў тактычнай авіяцыі. Мы таксама бачым палёты стратэгічнай бамбардзіровачнай авіяцыі амерыканцаў, якія адпрацоўваюць вучэбна-баявыя задачы па нанясенні удараў па нашай тэрыторыі», — заявіў міністр абароны.
