Агляд праводзіцца з мэтай ацэнкі паўнаты і правільнасці распрацоўкі лесасек, нарыхтоўкі жывіцы, а таксама выяўлення пакінутых недарубаў, нявывезенай драўніны, жывіцы і іншых парушэнняў пры ажыццяўленні нарыхтоўкі. Агляду падлягаюць лесасекі, на якіх праводзіліся высечкі лесу на падставе лесарубнага білета, участкі ляснога фонду, прадастаўленыя для нарыхтоўкі жывіцы. Работы на ўчастках, якія трапілі пад радыеактыўнае забруджванне, ажыццяўляюцца з улікам патрабаванняў правіл вядзення лясной гаспадаркі на тэрыторыях, якія зведалі радыеактыўнае забруджванне ў выніку аварыі на Чарнобыльскай АЭС.

Пры аглядзе лесасек правяраецца выкананне патрабаванняў заканадаўства аб выкарыстанні, ахове, абароне і ўзнаўленні лясоў, а таксама патрабаванняў, выкладзеных у лесарубным білеце, тэхналагічнай карце на распрацоўку лесасекі. Па кожнай з іх вызначаецца стан лесагаспадарчых дарог і пад’язных шляхоў да іх, па якіх праводзілася вывазка драўніны, лесагаспадарчых знакаў і меж лесасекі, аб’ём незаконна нарыхтаванай драўніны і колькасць пашкоджаных дрэў, аб’ём нарыхтаванай, нявывезенай драўніны, аб’ём недарубаў, захаванасць насенных дрэў і іх груп, іншых дрэў, якія не падлягаюць высечцы, а таксама захаванасць маладняку, захаванасць урадлівага слоя глебы і іншае.

Пры аглядзе ўчасткаў ляснога фонду, прадастаўленых для нарыхтоўкі жывіцы, вызначаюцца межы ўчастка, стан і захаванасць лесагаспадарчых дарог і лесагаспадарчых знакаў, выкананне патрабаванняў да парадку нарыхтоўкі жывіцы, норм працягласці нарыхтоўкі, тэхналагічных параметраў, тыпавых тэхналагічных схем, пералікаў стымулятараў выхаду жывіцы, а таксама стану верхняга ўрадлівага слоя глебы ў месцах вядзення работ з вызначэннем плошчы парушанага або знішчанага слоя, захаванне ўмоў, пазначаных у лясным білеце.

Пастанова ўступае ў сілу пасля яе афіцыйнага апублікавання.