7 лістапада мінчане прымалі на сваёй пляцоўцы баскетбалістаў «Астаны» і выйгралі з розніцай 31 ачко — 75:44. Самым рэзультатыўным у складзе гаспадароў стаў Давід-Масэнге Мукетэ, які набраў 13 балаў, у актыве Івана Катоўскага на два ачкі менш. Заўтра сапернікі зноў сустрэнуцца ў беларускай сталіцы.

Пасля 13 праведзеных матчаў «МІНСК» набраў 20 ачкоў і займае 8-е месца ў турнірнай табліцы. Дзве наступныя гульні падапечныя Дзмітрыя Калтунова таксама правядуць у сябе дома — 11 і 12 лістапада іх чакаюць сустрэчы з лідарам маладзёжнага турніру маскоўскім МБА-МАІ.

У рэгулярным чэмпіянаце гуляюць 14 клубаў, якія правядуць чатырохкругавы турнір (па два матчы дома і ў гасцях), а затым васьмёрка лепшых выйдзе ў плэй-оф. Пераможцы чвэрцьфінальных пар згуляюць у вырашальным этапе — «Фінале чатырох». Маладзёжная каманда «МІНСКА» ў сваім дэбютным сезоне прабілася ў чвэрцьфінал, уступіўшы маскоўскаму МБА-МАІ, які ў выніку стаў пераможцам Маладзёжнай лігі.