Перш за ўсё звяртае на сябе ўвагу, што відаў абанементаў два. Першы прадугледжвае  наведванне абсалютна ўсіх 34 матчаў «Дынама» ў рэгулярным чэмпіянаце-2025/26. Другі разлічаны на гульні ў святочныя, перадсвяточныя і выхадныя дні.

У абодвух варыянтаў ёсць несумненная выгада перад купляй квіткоў на кожны матч. Фактычна ўладальнік абанемента на цэлы сезон плаціць за 20 квіткоў, а набывае магчымасць наведаць 34 гульні. Што датычыцца другога віду, то тут таксама ёсць перавагі. За кошт, эквівалентны 10 паядынкам, даецца шанц 13 разоў наведаць «Мінск-Арэну».

Далей — катэгорыі абанементаў, іх тры. Месцы падзелены па размяшчэнні на трыбунах аб’екта. Самая дарагая цэнавая катэгорыя — так званыя цэнтральныя сектары ніжняга яруса. Следам ідуць балконы і, нарэшце, крэслы за варотамі ніжняга яруса.

Самы дарагі абанемент на цэлы сезон каштуе 1200 беларускіх рублёў, самы танны — 200. Асобна звернем увагу, што існуе спецыяльная прапанова — 2400 рублёў за найлепшыя месцы.

Набыць абанементы можна ў растэрміноўку. Акрамя таго, для пастаянных балельшчыкаў — тых, хто ўжо валодаў абанементам у мінулым годзе, — ёсць зніжкі.