Ульянаўск і Мінская вобласць: дзве індустрыяльныя тэрыторыі з агульнай будучыняй

Ульянаўск і Мінск — два гарады з багатай гісторыяй і моцнымі прамысловымі традыцыямі, якія сёння становяцца пунктамі росту для міжрэгіянальнага супрацоўніцтва. Ульянаўск вядомы як радзіма айчыннага аўтапрама і цэнтр машынабудавання, дзе працуюць найбуйнейшыя прадпрыемствы Расіі, якія фарміруюць тэхналагічны патэнцыял краіны. Мінск — не толькі сталіца Беларусі, але і адзін з галоўных індустрыяльных цэнтраў. На долю ж цэнтральнага рэгіёна прыпадае значная частка прамысловай вытворчасці краіны. Старшыня Мінскага аблвыканкама Аляксей Кушнарэнка расказаў, якія агульныя падыходы могуць быць паміж дзвюма абласцямі.

— Наша сустрэча заклікана садзейнічаць умацаванню сяброўскіх сувязяў, абмену вопытам і пошуку новых магчымасцяў для сумеснага развіцця вытворчасцяў, інавацыйных праектаў і эканамічнага супрацоўніцтва. У Мінскай вобласці, гэтак жа, як і ва Ульянаўскай, адной з вядучых галін эканомікі з’яўляецца машынабудаванне, — адзначыў губернатар Міншчыны.
Важна таксама адзначыць, што цэнтральны рэгіён фарміруе пятую частку ўсяго аб’ёму прамысловай вытворчасці Беларусі.

— У сувязі з гэтым аснова нашай дэлегацыі сфарміравана менавіта з кіраўнікоў флагманаў прамысловых прадпрыемстваў. З Расійскай Федэрацыяй мы ўжо даўно эфектыўна развіваем сумесныя праекты ў сферы прамысловай кааперацыі, узаемадзейнічаем па ўзаемных пастаўках імпартазамяшчальнай прадукцыі, — падкрэсліў Аляксей Кушнарэнка.
Паводле слоў губернатара Міншчыны, патэнцыял эканомікі двух рэгіёнаў не ў поўнай меры рэалізаваны і дазваляе знайсці новыя пункты росту.

— Упэўнены, што адкрыты дыялог, абмен ідэямі і практычнымі рашэннямі паслужыць залогам далейшага пашырэння партнёрскіх адносін і рэалізацыі значных сумесных ініцыятыў, — рэзюмаваў кіраўнік цэнтральнага рэгіёна.

Трывалая аснова для далейшага партнёрства

У сваю чаргу губернатар Ульянаўскай вобласці Аляксей Рускіх падкрэсліў, што візіт дэлегацыі расійскага рэгіёна ў Мінскую вобласць у верасні гэтага года пакінуў самыя яркія ўражанні. «Мы на свае вочы пераканаліся ў высокім прамысловым і тэхналагічным патэнцыяле прадпрыемстваў краіны. Мы адчулі ўзаемную зацікаўленасць у сумеснай рабоце», — сказаў ён.

Дарэчы, гэта зацікаўленасць пачала ўжо прыносіць першыя вынікі.

— Упэўнены, што многія з прысутных тут прадстаўнікоў бізнесу памятаюць тыя жывыя і прадметныя перагаворы. Дзякуючы ім сёння мы можам гаварыць аб канкрэтных кроках: пастаўках сучаснага інструмента «ХАЛТЭК» і іншых перспектыўных праектах у аўтамабілебудаванні і машынабудаванні — гэта трывалая аснова для далейшага партнёрства, — адзначыў Аляксей Рускіх.

Ульянаўская вобласць гатовая прапанаваць цэнтральнаму рэгіёну Беларусі цэлы шэраг канкурэнтаздольных рашэнняў.

— Гаворка ідзе не толькі аб металарэзным інструменце або станках, але і аб комплекснай лічбавізацыі вытворчасці, аб укараненні сістэм аўтаматызацыі, пастаўках надзейнага электратэхнічнага абсталявання. Нашы кампаніі адкрытыя для дыялогу, — падсумаваў губернатар Ульянаўскай вобласці.

Супрацоўніцтва Беларусі і Расіі — гэта не канкурэнцыя, а ўзаемнае дапаўненне

Каменціруючы сваю працоўную паездку ва Ульянаўск, Аляксей Кушнарэнка адзначыў, што два бакі павінны не канкурыраваць, а дапаўняць адзін аднаго. Прычым рабіць гэта эфектыўна, за кошт кааперацыі і імпартазамяшчэння. Паводле слоў губернатара Міншчыны, ад насычанага візіту засталіся самыя спрыяльныя ўражанні.

— Са мной — прадстаўнічая дэлегацыя вядучых прадпрыемстваў Мінскай вобласці. Хацеў бы адзначыць наша наведванне Федэральнага навукова-клінічнага цэнтра радыялогіі і анкалогіі ФМБА Расіі. Унікальныя тэхналогіі, і што вельмі важна, цэнтр працуе вынікова і тут рэалізуецца саюзная праграма. У рамках саюзнага бюджэту лечацца пацыенты як з Расійскай Федэрацыі, так і з Рэспублікі Беларусь. На наступны год запланавана, што 100 пацыентаў з дзвюх краін пройдуць курс лячэння ў гэтым унікальным цэнтры, якраз за кошт сродкаў Саюзнай дзяржавы, — праінфармаваў Аляксей Кушнарэнка.

Наступнае прадпрыемства, якое наведаў кіраўнік цэнтральнага рэгіёна, — «Палессе». Як адзначыў губернатар Міншчыны — гэта таксама свайго роду ўнікальнае, створанае беларусам прадпрыемства.

— Нашы беларускія тэхналогіі плюс расійская сыравіна дазваляе на выхадзе атрымліваць больш за тры тысячы найменняў цацак, якія радуюць нашых дзетак. Прычым яны арыентаваны, як вы маглі заўважыць, на нашы каштоўнасці, на прадукцыю, якую мы выпускаем, як у Рэспубліцы Беларусь, так і ў Расійскай Федэрацыі. Тут можна ўбачыць мадэлі аўтамабіляў МАЗ, КАМАЗ, БелАЗ і іншыя.

Падчас рабочага візіту Аляксея Кушнарэнкі ва Ульянаўск дэлегацыя таксама наведала мясцовы станкабудаўнічы завод і пераканалася: тут ствараюць не толькі такарныя і фрэзерныя станкі, але і комплексныя рашэнні для ключавых галін — ад аўтамабілебудавання да медыцыны і металургіі. Не застаўся без увагі і Цэнтр тэхналогій і рашэнняў, дзе супрацоўнікі навучаюць спецыялістаў рабоце з сучаснымі станкамі. Губернатар падкрэсліў, што менавіта такія прадпрыемствы фарміруюць кадравы і тэхналагічны падмурак для будучыні прамысловасці. 

Кіраўнік цэнтральнага рэгіёна таксама наведаў філіял ТАА «ДАККОР» «Волга» АТ «Кантактар» — прадпрыемства, якое сёння з’яўляецца ключавым гульцом расійскага электратэхнічнага рынку.

Данііл ХМЯЛЬНІЦКІ.

Фота прэс-службы Мінскага аблвыканкама.