Гэта найбуйнейшая аграпрамысловая выстаўка Беларусі. Тут адначасова прысутнічаюць усе: вытворцы, гандлёвыя сеткі, аптовыя закупшчыкі і дзясяткі тысяч звычайных спажыўцоў.
Сёлета форум пройдзе з 2 да 6 чэрвеня, на які ўжо пададзены 540 заявак з 11 краін.
Як расказалі ў Мінсельгасхарчы, геаграфія краін-удзельніц пашыраецца год ад году. Сёлета возьмуць удзел прадстаўнікі з Беларусі, Расіі, Турцыі, Грузіі, Амана і іншых краін. Будуць прадстаўлены 18 рэгіёнаў Расіі на ўзроўні кіраўніцтва сваіх міністэрстваў сельскай гаспадаркі. Пяць расійскіх рэгіёнаў прыедуць са сваімі экспазіцыямі: Белгарадская, Бранская, Чалябінская, Мурманская вобласці, а таксама Краснадарскі край.
Традыцыйна выстаўкі прадугледжваюць статычную экспазіцыю, дзе тэхніка прадстаўлена ў нерухомым стане. Наведвальнікі могуць агледзець машыны, вывучыць тэхнічныя характарыстыкі, але не ўбачыць іх у дзеянні. Сёлета Мінсельгасхарч удасканальвае экспазіцыю.
— Для замежных дэлегацый у 2026 годзе мы арганізавалі цікавую лакацыю. У нас падрыхтавана поле, дзе будзе дэманстравацца беларуская сельскагаспадарчая тэхніка ў працы. Усе ўдзельнікі ад замежных дэлегацый, а таксама спецыялісты галіны могуць паназіраць, як працуе сельгастэхніка на практыцы.
Акрамя таго, выстаўку наведае шэраг міжнародных арганізацый, напрыклад, намеснік генеральнага сакратара ШАС, генеральны дырэктар ФАО, прадстаўнікі Еўразійскай эканамічнай камісіі, — паведаміла начальнік галоўнага ўпраўлення Міністэрства сельскай гаспадаркі і харчавання Беларусі Ксенія Мялешка.
На адлегласці 18 кіламетраў ад выставачнага цэнтра «Белэкспа» абрана дэманстрацыйнае поле, дзе будзе прадстаўлена тэхніка беларускіх вытворцаў у дынаміцы. Гасцям прадэманструюць, як машыны працуюць з улікам глебава-кліматычных умоў, рэльефу і геаграфічных асаблівасцяў.
На дэманстрацыйнай пляцоўцы будзе прадстаўлена шырокая лінейка тэхнікі для розных этапаў сельскагаспадарчай вытворчасці: сеялка, модульны глебаапрацоўчы агрэгат, культыватар, каменеўборочная машына, самаходны апырсквальнік, машына для ўнясення ўгнаенняў, комплекс для мульчавання.
У Мінсельгасхарчы адзначылі, што дэманстрацыя ў палявых умовах практыкуецца на вядучых сусветных выстаўках. «Белагра» таксама імкнецца павышаць узровень аграпрамысловага форуму для прафесійнай аўдыторыі, умацоўваючы пазіцыі беларускіх вытворцаў на міжнародных рынках.
Падчас правядзення «Белагра» запланавана і вялікая дзелавая праграма. Так, летась стартаваў форум «АграШАС», у гэтым годзе ён будзе працягнуты. Беларусь пакажа свае магчымасці агратурызму. З навацый — дзелавыя колы абмяркуюць магчымасці рознічнага гандлю і выклікі, з якімі ён сутыкаецца.
— Насычаная праграма будзе для прадстаўнікоў рознічнага гандлю. Акрамя таго, прыедуць расійскія гандлёвыя сеткі для таго, каб правесці перамовы і заключыць кантракты з беларускімі вытворцамі, — адзначыла Ксенія Мялешка.
У дзелавой частцы плануюць абмеркаваць і новыя тэхналогіі ў малочнай галіне, аграрную адукацыю і гаспадарчыя ўмовы для прадпрыемстваў з Расійскай Федэрацыі на тэрыторыі нашай краіны.
Адметнасць кожнай выстаўкі — яе конкурсы. Сёлета таксама не абыдзецца без гэтага элемента праграмы. Выберуць лепшага аратага, лепшага племяннога каня, а таксама чэмпіёна смаку. Аб апошнім — крыху падрабязней.
«Чэмпіён смаку» — гэта фармат закрытых дэгустацый, дзе прадукты ацэньваюцца выключна па смакавых якасцях, без упакоўкі і ўказання брэнда. Конкурсу 13 гадоў, і ён застаецца адзіным у Беларусі прафесійным дэгустацыйным конкурсам, які аб’ядноўвае меркаванні спажыўцоў і экспертаў.
Сёлета этапы конкурсу наступныя: 25 мая — экспертная дэгустацыя; 26-27 мая — народная дэгустацыя ў фокус-групах; 2-4 чэрвеня — народная дэгустацыя на «Белагра»; 5 чэрвеня — узнагароджанне.
«Чэмпіён смаку» — яркая падзея выстаўкі. Пабываць на закрытых дэгустацыях можа любы ахвотны з гасцей і ўдзельнікаў форуму. Цікавасць да конкурсу велізарная, бо праз стэнд «Чэмпіён смаку» за тры дні праходзіць больш за 10 тысяч удзельнікаў — каштуюць, галасуюць, дзеляцца ўражаннямі. Многія хочуць адразу купіць упадабаныя прадукты — і такая магчымасць ёсць. Другі год запар на «Белагра» дзейнічае гандлёвы пункт: то-бок ад дэгустацыі да куплі — адзін крок.
