Асаблівая ўвага пры падрыхтоўцы ўдзялялася добраўпарадкаванню тэрыторый і паляпшэнню інфраструктуры. Па словах начальніка службы па ўтрыманні гарадскіх лясоў, пляжаў і МКАД УП «Мінская лесапаркавая гаспадарка» Марыны Макаравай, асноўны акцэнт рабіўся на павышэнне камфорту і бяспекі адпачывальнікаў.

Сярод новаўвядзенняў гэтага года — подыум для загару на пляжы № 1 Цнянскага вадасховішча і фотазона на ўчастку № 5. Акрамя таго, абнавілі дарожнае пакрыццё на пад’ездах да тэрыторый № 5 і № 6, правялі рамонт і разметку на парковачных месцах.

У гэтым сезоне ўстаноўлена больш за 30 новых раздзявалак і 78 прыбіральняў, у тым ліку для людзей з абмежаванымі магчымасцямі. Таксама з’явіліся новыя лаўкі, ценявыя навесы, альтанкі, мангалы і велапаркоўкі. Таксама на пляжы № 1 Заслаўскага вадасховішча абсталявана футбольная пляцоўка.

— Мы імкнемся рабіць аднолькавыя ўмовы на ўсіх участках — калі на адным ужо ёсць пэўны аб’ект, то з часам ён абавязкова з’явіцца і на іншых, — патлумачыла спецыяліст. — Такі падыход дапамагае забяспечыць добры адпачынак ва ўсіх частках горада.

Абслугоўваннем пляжаў займаецца пастаянны штат супрацоўнікаў, які на лета папаўняецца часовымі работнікамі. Падбор сезоннага персаналу яшчэ працягваецца, але большая частка каманды ўжо ўкамплектавана.

Бяспеку на вадзе сёлета будуць гарантаваць восем выратавальных станцый і 20 сезонных пастоў, якія працуюць з 1 мая па 30 верасня. Дадаткова ўстановяць 12 выратавальных вышак для назірання за сітуацыяй на пляжах.

Сярод экалагічных мер — ўстаноўка дадатковых смеццевых кантэйнераў. Так, на пляжы № 1 Заслаўскага вадасховішча дадалі пяць бакаў, а на ўчастку № 2 — тры.

Гарадскія службы працягваюць паляпшаць умовы адпачынку.