«Часцяком для нас сапраўды было аб’ектыўнай праблемай будаваць базавыя станцыі ўздоўж дарог, бо яны часта праходзяць у запаведных месцах. Ёсць рашэнне, згодна з якім мы проста не можам узяць і паставіць аб’екты, напрыклад, на землях сельскагаспадарчага прызначэння або ляснога фонду, якія, увогуле, размешчаны вакол дарог. І гэта былі пэўныя абмежаванні для нас», — растлумачыў Павел Ткач.

У адпаведнасці з рашэннем кіраўніка дзяржавы цяпер Мінсувязі дадзена магчымасць будаўніцтва станцый у палосах адводу як аўтамабільных дарог, так і чыгункі. «З гэтай мэтай мы ўжо распрацавалі тыпавую схему двух рашэнняў, якая ўзгоднена з Дзяржаўнай аўтамабільнай інспекцыяй. Трэба разумець, што аб’ект, які блізка стаіць уздоўж хуткаснай дарогі, — гэта патэнцыяльная небяспека. Каб не здарылася аварыі з цяжкімі наступствамі, мы выпрацавалі тэхнічныя рашэнні і ўзгаднілі іх з аўтаінспекцыяй», — адзначыў ён. 

Падыход знаходзіцца на заключнай стадыі ўзгаднення з Мінтрансам, каб гэтае рашэнне можна было актыўна выкарыстоўваць уздоўж дарог.