Бюро Міжнароднай федэрацыі водных відаў спорту (World Aquatics) аб’явіла аб зняцці абмежаванняў з дарослых спартсменаў, якія маюць расійскае і беларускае спартыўнае грамадзянства, паведамляе РІА «Новости».
Рашэнне прынята пасля кансультацыі з падраздзяленнем па забеспячэнні сумленнасці ў водных відах спорту (Aquatics Integrity Unit, AQIU) і камітэтам спартсменаў World Aquatics.
«Дарослым спартсменам з беларускім або расійскім спартыўным грамадзянствам будзе дазволена ўдзельнічаць у спаборніцтвах World Aquatics на тых жа ўмовах, што і іх калегам, якія прадстаўляюць іншыя спартыўныя нацыянальнасці, — з адпаведнай уніформай, сцягамі і гімнамі», — гаворыцца ў заяве на сайце World Aquatics.
