Чэмпіён Беларусі «МЛ Віцебск» у намінальна дамашнім паядынку прыме ў венгерскім Мезекевешдэ баснійскі «Борац» (пачатак гульні ў 20.00). Галоўным суддзёй гэтай сустрэчы будзе англійскі рэферы Эндру Мэдлі. Тыдзень таму ў Баня-Луцэ віцябчане саступілі з мінімальнай розніцай у ліку (0:1) і сёння паспрабуюць узяць рэванш. Калі «МЛ Віцебск» па суме дзвюх сустрэч выйграе ў баснійцаў, то ў матчах за выхад у асноўны этап ЛК сустрэнецца з прайграўшым у пары Лігі Еўропы «Тун» (Швейцарыя) — «Вікінгур» (Рэйк’явік, Ісландыя). У іх першай сустрэчы швейцарцы абыгралі паўночнікаў у сябе дома з лікам 3:0. Віцябчане пачыналі гэты еўракубкавы сезон у кваліфікацыі Лігі чэмпіёнаў, двойчы саступіўшы румынскай «Універсітатэ» з Краёвы — 1:4 і 0:1. Перамясціўшыся ў другі кваліфікацыйны раўнд Лігі канферэнцый, яны ўпэўнена прайшлі чарнагорскую «Суцьеску» з Нікшыча, атрымаўшы дзве перамогі — 3:0 і 2:1.

Мінскае «Дынама» ў балгарскім горадзе Стара-Загора будзе сапернічаць з партугальскай «Брагай» (пачатак у 20.00; прамая трансляцыя на тэлеканале «Беларусь 5»). Гэту сустрэчу рассудзіць румынская брыгада арбітраў, якую ўзначаліць Сабалч Ковач. На мінулым тыдні ў Партугаліі мінчане прайгралі 0:1, і калі яны змогуць узяць рэванш, то іх наступным сапернікам будзе пераможца пары «Бейтар» (Іерусалім, Ізраіль) — «Аустрыя» (Вена, Аўстрыя). У першай гульні аўстрыйцы атрымалі выязную Вікторыю з вынікам 2:1. У першым раўндзе кваліфікацыі ЛК мінскія дынамаўцы абышлі паўночнамакедонскі «Сілекс» з Кратава, а затым аказаліся мацнейшымі за азербайджанскі «Нефтчы» з Баку.