Калі казаць пра мэтавую форму навучання, то, падаючы дакументы на канкрэтную вобласць, студэнт ведае, што будзе адпрацоўваць належны па законе тэрмін, не выязджаючы за межы, напрыклад, Гродзенскай, Брэсцкай ці Мінскай вобласці. «Вядома, магчымы розныя жыццёвыя сітуацыі, і пры размеркаванні ўжо міністэрства ўсе абставіны прымае да ўвагі. Але ў цэлым абітурыент для сябе ўжо робіць выбар, у якім напрамку і ў якім рэгіёне ён хацеў бы ў далейшым працаваць, — падкрэсліў Віктар Кудло. — Урачы могуць пераязджаць з адной вобласці ў іншую, пераразмеркаванне магчыма. Напрыклад, гэта могуць быць абставіны, звязаныя з сямейным становішчам, дзецьмі і гэтак далей».

На яго думку, многія ўспрымаюць мэтавае навучанне як ледзь не прыгоннае права, хаця ўніверсітэт тлумачыць, што студэнт мэтавай формы — гэта сапраўды такі ж студэнт, як і ўсе. «Усе студэнты навучаюцца разам, ніякіх спецыяльных груп для мэтавікоў ніхто не робіць, ніякіх спецыяльных месцаў працы для мэтавікоў таксама ніхто не робіць. Паступаючы, асабліва ў медыцынскую ВНУ, студэнт пачынае ўсё з нуля: увесь той багаж, які быў у школе, застаецца ў школе. Ён паступае, зарабляе для сябе прэферэнцыі, бонусы, балы, каб у далейшым ужо атрымаць спецыяльнасць пасля пятага курса. Гэта называецца медыцынскі курс субардынатуры, і тут ужо ад жаданага профілю нехта сыходзіць у тэрапію, нехта ў акушэрства і гінекалогію, нехта ў хірургію. Вядома, тут улічваецца і тое, як студэнт навучаўся ў ВНУ, — адзначыў дэкан. — Хтосьці ў школе мог не быць выдатнікам, але, калі прыйшоў у ВНУ, чалавек зразумеў сутнасць навучальнага працэсу, асабліва калі ён высока матываваны і яму падабаецца. Тады ён атрымлівае асалоду ад вучобы і хоча атрымліваць новыя веды. Мы бачым, што такія студэнты потым заканчваюць універсітэт з чырвоным дыплом, хаця ў школе ніколі не мелі такіх адзнак».

Што датычыцца медыцынскіх ВНУ, Міністэрства аховы здароўя зацікаўлена ў студэнтах, у тым ліку мэтавіках, якія ў працэсе навучання атрымліваюць і прэзідэнцкія стыпендыі, і ў іх бал у залікоўцы бліжэй да 10 балаў. «Іх могуць адразу прыцягнуць у бальніцы, якія зацікаўлены ў вышэйшым узроўні аказання медыцынскай дапамогі, — гэта трэці, чацвёрты ўзровень у абласных бальніцах, рэспубліканскіх навукова-практычных цэнтрах. Практычна штогод нашы выпускнікі, нават з улікам таго, што ў нас рэгіянальная ВНУ, на размеркаванне з’язджаюць у розныя навукова-практычныя цэнтры», — расказаў Віктар Кудло.

Фота з адкрытых крыніц