Аўтамабільны мост цераз раку Прыпяць пабудуюць паміж Столінскім і Лунінецкім раёнамі. Аб’ект уключаны ў Праграму развіцця раёнаў Прыпяцкага Палесся, паведаміў БелТА старшыня камітэта па архітэктуры і будаўніцтве Брэсцкага аблвыканкама Андрэй Слуцкі.
Будаўніцтва моста забяспечыць круглагадовыя транспартныя зносіны паміж Столінскім і Лунінецкім раёнамі і іншымі населенымі пунктамі Брэсцкай і Мінскай абласцей па найкарацейшым шляху. Цяпер паміж Лунінцом і Столінам маршрут працягласцю больш за 40 км можна пераадолець па паромнай пераправе, якая функцыянуе толькі ў цёплы перыяд. Тры-чатыры месяцы ў годзе з-за ўмоў надвор’я яна не дзейнічае. У год паром з аднаго берага на другі дастаўляе больш за 20 тыс. аўтамабіляў. Пры гэтым пераправіць цяжкавагавую буйнагабарытную тэхніку нельга.
«Правялі нараду з выездам на месца з удзелам кіраўніцтва Столінскага і Лунінецкага райвыканкамаў, праекціроўшчыкаў, падрадных арганізацый, іншых зацікаўленых службаў. Папярэдне было вызначана месца, дзе будзе праходзіць аўтамабільны мост. Уключаем гэты аб’ект у абласную інвестпраграму, каб пачынаць працаваць па падрыхтоўцы праектнай дакументацыі», — сказаў Андрэй Слуцкі. Ён звярнуў увагу, што аб’ект няпросты. «Там чацвёрты клас воднага шляху. Мост будзе вышынёй 10—12 м. Да яго трэба зрабіць пад’езды, а вакол забалочаная мясцовасць. Шмат аспектаў трэба ўлічыць», — растлумачыў старшыня камітэта. Намечана, што будаваць мост цераз Прыпяць пачнуць у 2026 годзе. Пастаўлена задача ўвесці яго ў эксплуатацыю ў 2027 годзе.
Паводле ацэнак спецыялістаў, па напрамку Столін — Лунінец — населеныя пункты Брэсцкай і Мінскай абласцей транспартны паток складае 400 аўтамабіляў у суткі. Столінскі і Лунінецкі раёны — адны з найбуйнейшых на Брэстчыне, з насельніцтвам 68 тыс. і 60 тыс. чалавек адпаведна. Яны валодаюць развітой прамысловасцю і сельскай гаспадаркай. Спрашчэнне лагістыкі дазволіць скараціць шлях, значна нарасціць аб’ёмы перавозак пасажыраў і грузаў. Будаўніцтва моста адаб’ецца і на развіцці турыстычнага патэнцыялу Палесся.
