Да канца 2026 года Мінскі трактарны завод плануе паставіць ва Узбекістан не менш як 2 тыс. трактаракамплектаў у рамках сумеснага праекта з Agromax Technic. Аб гэтым расказаў намеснік начальніка ўпраўлення пашырэння і рэалізацыі прадукцыі ў краінах СНД маркетынг-цэнтра ААТ «МТЗ» Аляксандр Суравец, паведамляе БелТА.
«Мінскі трактарны завод рэалізуе ва Узбекістане значны кааперацыйны праект. У горадзе Нурафшан арганізавана зборачная вытворчасць па выпуску трактароў BELARUS. Вытворчы патэнцыял кампаніі складае пры адназменным рэжыме работы больш за тры тысячы адзінак у год. Каб узбекская кампанія атрымлівала дзяржаўную субсідыю ў памеры 15 працэнтаў, распрацавана дарожная карта, якая прадугледжвае ўзровень лакалізацыі вытворчасці ў памеры 30 працэнтаў», — расказаў Аляксандр Суравец.
Паміж ААТ «МТЗ» і Agromax Technic заключаны ліцэнзійныя дагаворы на прамысловую зборку і таварны знак на трактарную тэхніку BELARUS магутнасцю ад 50 да 212 к. с. Цяпер сертыфікавана 12 мадэляў трактароў, яшчэ адна пройдзе сертыфікацыю да канца ліпеня.
