Тэхніку набыла Акадэмія нацыянальнай адукацыі. На 2026 год запланавана набыццё трактароў мадэляў 3522, 2022 і 1523.3. Як сказаў генеральны канструктар ААТ «МТЗ» Ігар Зямцоў, мадэлі адпавядаюць актуальным патрабаванням рынку і эксплуатацыі. «Навучацца неабходна з улікам новых дапрацовак, паколькі менавіта з такой тэхнікай сутыкнецца чалавек на практыцы. Вучыць трэба заўсёды, нават трохі забягаючы наперад. Пакуль студэнты вучацца, завод развіваецца і выпускае новыя мадэлі», — растлумачыў ён.

Генеральны канструктар адзначыў і іншыя распрацоўкі завода. Сярод іх — трактар BELARUS 5425 магутнасцю 500 к. с., гусенічны трактар і шахтавая машына. Тэхніка адпавядае міжнародным патрабаванням і праходзіць выпрабаванні. Паводле слоў Ігара Зямцова, вынікі ў цэлым станоўчыя, гаспадаркі даюць добрыя водгукі.

Паралельна МТЗ уносіць змены ў мадэлі, што выпускаліся раней, і рыхтуецца да наступнага ўзроўню трактарабудавання. «Свет не стаіць на месцы, з’яўляюцца новыя патрабаванні да гідраўлікі і агрэгатавання. Завод павінен не адставаць ад сучасных трэндаў і адпавядаць запытам часу», — падкрэсліў спецыяліст.

Паводле слоў рэктара Акадэміі нацыянальнай адукацыі Вольгі Рыбаключавай, у рамках дзяржаўнай праграмы «Беларусь інтэлектуальная» на 2026–2030 гады запланавана ўмацаванне матэрыяльна-тэхнічнай базы ўстаноў сярэдняй спецыяльнай адукацыі 76 трактарамі. На гэты момант з сённяшняй партыяй каледжам перададзены 61 трактар, сёлета плануецца перадача яшчэ 15.

Рэктар адзначыла, што тэхніка абсталявана сістэмай дакладнага земляробства. Гэта дазволіць будучым спецыялістам асвойваць перадавыя тэхналогіі вядзення сельскай гаспадаркі, набываць практычныя навыкі работы з сучасным абсталяваннем і знаёміцца з лічбавымі рашэннямі, якія сёння актыўна ўкараняюцца ў аграпрамысловым комплексе.

Яна звярнула ўвагу, што ў 2027 годзе Міністэрства адукацыі плануе стварыць цэнтры рабатызацыі і аўтаматызацыі вытворчасці ў кожнай вобласці. Цэнтры будуць мець міжгаліновы характар і будуць накіраваны на рэалізацыю Праграмы сацыяльна-эканамічнага развіцця ў частцы рабатызацыі. «Плануецца павялічыць колькасць робатаў з 13 адзінак на 10 тыс. насельніцтва да 100 адзінак да 2030 года. Падрыхтоўку спецыялістаў таксама ўжо трэба планаваць, каб выпускнікі каледжаў разумелі, з чым будуць працаваць», — падкрэсліла Вольга Рыбаключава.