«Перааснашчэнне ідзе ў ліцейным цэху нумар 1. Коксавыя вагранкі адкрытага тыпу ў хуткім часе будуць заменены на сучасныя індукцыйныя агрэгаты кітайскай вытворчасці. Пляцоўка для мантажу практычна гатова, абсталяванне паступае на прадпрыемства», — расказаў выконваючы абавязкі намесніка тэхнічнага дырэктара па падрыхтоўцы металургічнай вытворчасці — галоўнага металурга завода Уладзіслаў Дашын.

Ён адзначыў, што за апошнія гады рэалізавана некалькі значных праектаў, у тым ліку адносна забеспячэння энергаэфектыўнасці вытворчасці. Напрыклад, укараненне ў кавальскім цэху аўтаматычных дыскавых адразных станкоў для парэзкі пракату замест парубкі на прэс-нажніцах з газавым нагрэвам сэканоміла 1,5 тыс. т умоўнага паліва. А мадэрнізацыя тэрмічнай печы з аўтаматычнай сістэмай кантролю і рэгулявання газазабеспячэння ў ліцейным цэху нумар 3 эканоміць больш як 250 т умоўнага паліва ў год.

«На стадыі завяршэння знаходзіцца ўкараненне сучаснага загартавальна-адпускнога агрэгата ў сталеліцейным цэху, а таксама шратамётных камер для ачысткі ліцця ў ЛЦ-2», — дадаў спецыяліст.