«Гонарам 2025 года з’яўляецца папаўненне Музейнага фонду Нацыянальнага банка двума нумізматычнымі комплексамі першай паловы ХV стагоддзя. Гістарычная і навуковая каштоўнасць гэтага матэрыялу дастаткова вялікая. Яго стараннае вывучэнне дазволіць перагледзець і ўдакладніць існуючыя веды аб грашовай гаспадарцы на беларускіх землях у той перыяд. Падобныя комплексы досыць вялікая рэдкасць, і яны па праве павінны мець статус дзяржаўнага значэння», — сказаў Раман Галоўчанка.

У Нацбанку дадалі, што комплексы былі выяўлены каля вёскі Княжыцы Магілёўскага раёна: адзін — у канцы 1990-х, другі — вясной 2004 года. У іх змяшчаецца 39 зліткаў, з іх 27 зліткаў з кляймом «заходняга» тыпу, а таксама 700 пражскіх грошаў. Пры гэтым на злітках прадстаўлены 13 з 16 вядомых на бягучы момант клеймаў.