«Як мне пераканацца, што гэта не розыгрыш?» — спытаў 58-гадовы Ары Ходара пасля таго, як арганізатары патэлефанавалі яму па выніках лёсавання, якое прайшло ў аўкцыённым доме Christie’s у французскай сталіцы.

Агенцтва Associated Press паведаміла, што мужчына назваў сябе аматарам мастацтва, прыхільнікам Пікасо і распавёў, што купіў білет на выхадных, выпадкова даведаўшыся пра дабрачынную латарэю падчас абеду ў рэстаране.

Трэцяя латарэя «1 Пікасо за 100 еўра» была прысвечана карціне мастака «Галава жанчыны» — гэта партрэт даўняй музы і партнёра Пікасо Доры Маар. Карціна, напісаная гуашшу на паперы, была створана мастаком у 1941 годзе.

Падчас анлайн-розыгрышу ва ўдзельнікаў быў шанц выйграць партрэт іспанскага мастака коштам 1 мільён долараў, сродкі ад продажу якога пойдуць на даследаванні хваробы Альцгеймера.

Арганізатары заявілі, што ўсе 120 тысяч білетаў былі прададзены па ўсім свеце, прынёсшы 12 мільёнаў еўра (14 мільёнаў долараў). З гэтай сумы 1 мільён еўра будзе выплачаны галерэі Opera Gallery, міжнароднаму арт-дылеру, якому належала карціна.