«Музыка не замяняе медыкаментознае абязбольванне, калі яно неабходнае, але з’яўляецца эфектыўным і бяспечным дапаможным інструментам. З пункту гледжання сучаснай медыцыны, спакойная, прыемная для маці музыка не толькі не шкодзіць дзіцяці, але і можа аказваць на яго апасродкаваны дабратворны ўплыў. Калі жанчына расслабляецца, слухаючы музыку, у яе арганізме зніжаецца ўзровень гармонаў стрэсу (у прыватнасці, картызолу), паляпшаецца кровазварот, у тым ліку і матачна-плацэнтарны. Гэта азначае, што малыш атрымлівае больш кіслароду і пажыўных рэчываў», — сказаў ён. 

Эксперт растлумачыў, што музычная тэрапія — гэта не новаўвядзенне, а прызнаны немедыкаментозны метад падтрымкі парадзіхі. Карысць ад правільна падабранай музыкі пацверджана шэрагам даследаванняў. Так, даследаванні, праведзеныя ў Турцыі ў 2014 годзе, паказалі, што музычная тэрапія падчас родаў памяншае ўспрыманне болю і ўзровень раздражнення. Таксама па выніках даследавання на Тайвані ў 2010 годзе было ўстаноўлена, што праслухоўванне музыкі спрыяльна ўплывае на роды і дапамагае перанесці іх лягчэй, асабліва тым жанчынам, хто нараджае ўпершыню. Унутрычэраўна дзіця пачынае паўнацэнна рэагаваць на гукі бліжэй да 20-га тыдня цяжарнасці. Звыклая, заспакаяльная музыка можа ствараць для плода адчуванне бяспекі. І наадварот, калі мелодыя будзе гучнай, агрэсіўнай, то вынік такога праслухоўвання можа быць шкодны для дзіцяці.

«Як урач, лічу практыку выкарыстання музыкі ў родах станоўчай, яе варта заахвочваць і ўкараняць, але ў разумных і бяспечных рамках. Рацыянальны і бяспечны падыход, які я падтрымліваю ў сваёй практыцы, калі жанчына загадзя падбірае любімую музыку, якая яе расслабляе і зараджае пазітывам. Многія радзільныя дамы ўжо даюць такую магчымасць, дазваляючы выкарыстоўваць уласныя аўдыяплэеры або прапаноўваючы гатовыя падборкі. Выкарыстанне навушнікаў дазваляе парадзісе цалкам паглыбіцца ў музыку, не перашкаджаючы пры гэтым рабоце ўрачоў, акушэрак і іншым пацыенткам», — расказаў спецыяліст.

Што датычыцца незвычайнай паслугі «дыджэй на роды», якая з’явілася на адным з сэрвісаў аб’яў у сеціве, урач адзначае: любы, хто прысутнічае на родах, павінен паказаць даведкі аб стане здароўя з-за рызыкі інфіцыравання. «Лішні чалавек у стэрыльнай зоне радзільнага блока — гэта заўсёды дадатковая рызыка. Работа медыцынскай каманды патрабуе канцэнтрацыі. Непрадказальныя паводзіны дыджэя або яго абсталяванне могуць перашкодзіць у крытычны момант. Той жа псіхалагічны і рэлаксацыйны эфект можа быць дасягнуты з дапамогай загадзя падрыхтаванага плэйліста, без лішніх затрат і складанасцяў».

Эксперт даў параду будучым мамам стварыць свой плэйліст для родаў і затым загадзя абмеркаваць магчымасць яго выкарыстання. «Падыход да родаў павінен быць у першую чаргу бяспечным і фізіялагічным, а музыка можа стаць цудоўным памочнікам на гэтым шляху, але не галоўнай дзеючай асобай», — падкрэсліў Аляксандр Кірушчанкоў.