Паводле яго слоў, сёлетнія ўмовы надвор’я ў частцы вырошчвання бульбы прыкладна аналагічныя леташнім. Красавік пачынаўся вельмі цёпла, таксама добра прыгравала і ў канцы сакавіка. «Глеба прагрэлася, шмат хто з вяскоўцаў „пагарачыўся“ і пачаў саджаць бульбу. Асабліва гэта нашы паўднёвыя рэгіёны — Брэст, Гомель. Я не кажу пра буйныя гаспадаркі, гэта найперш тычылася прыватнікаў. Ранняя сяўба вельмі дрэнна адбілася на далейшай захаванасці гэтых раслін. Мы давалі рэкамендацыі не спяшацца, але частка раслін ужо загінула», — адзначыў Вадзім Маханько.

Ён падкрэсліў: ранні ўраджай будзе затрымлівацца. «Мы, на вялікі жаль, у гэтым годзе не атрымаем запланаваны ранні ўраджай, які звычайна бывае ўжо ў канцы мая з прыватных падворкаў, — заўважыў гендырэктар. — У бульбы гіне надземная частка, але ў кожным вочку ёсць яшчэ па дзве дадатковыя почкі, якія зараз адрастаюць, і будзе новая надземная маса. Ізноў жа, гэта затрымка па часе і затрачванне запасаў матчынага клубня. Вільгаць бульбе зараз не патрэбна абсалютна ў большасці рэгіёнаў, таму што да вышыні надземнай часткі раслін 10-15 сантыментраў бульба сілкуецца цалкам усімі элементамі і вільгаццю з матчынага клубня. Толькі потым пачынае атрымліваць элементы харчавання і ваду праз каранёвую сістэму».

Што датычыцца плошчаў пасадкі — гэта плюс 3 тысячы гектараў да мінулага года ў буйнатаварных гаспадарках. Гэты план ужо перавыкананы. «Бульба, пасаджаная ў пачатку трэцяй дэкады красавіка, дзякуючы нізкім тэмпературам знаходзіцца прыкладна на той жа стадыі развіцця, як і тая, што пасаджана да 9 мая. Прыкладна тыя ж праросткі, ужо пачынаюць утварацца карэньчыкі», — падкрэсліў Вадзім Маханько. Пры гэтым у Беларусі сёлета ў тры разы павялічыўся попыт на насенную бульбу для пасадкі на дачных участках і на ўласных падворках.

Гендырэктар адзначыў, што бульба даўно выйшла з групы высокарэнтабельных культур, але без яе беларусы не могуць. «Сезон захоўвання 2024-2025 года гэта паказаў, — дадаў ён. — Сельгаспрадпрыемствы і буйныя фермерскія гаспадаркі ў гэтым годзе пасадзілі ўжо больш як 20,5 тыс. га бульбы. Калі надвор’е нас не падвядзе, то гэтай бульбы з лішкам хопіць нам, хопіць на іх перапрацоўку і хопіць паставіць нашым суседзям, калі ў іх будзе неўраджай».

Што да гародніны, то тут план перавыкананы на 1 тыс. га. «На сённяшні дзень пасаджана 8,6 тысяч гектараў. Як правіла, агароднінныя культуры — дробнанасенныя. Многім культурам не хапала вільгаці для нармальных усходаў. Гэта датычыцца морквы і яшчэ больш — цыбулі, — расказаў гендырэктар. — Частка культур яшчэ не высаджана па агратэхнічных тэрмінах. Добра, што ў краіну ідзе пацяпленне, цяпер справы пойдуць хутчэй».

Паводле інфармацыі БелТА