Абраз з выявай святых Аляксандра Неўскага і Ніны, асветніцы Грузіі, перадаў архіепіскапу Брэсцкаму і Кобрынскаму Іаану начальнік Брэсцкай мытні Сяргей Якута, паведамляе БелТА.
Цяпер святыня будзе захоўвацца ў Брэсцкай епархіі Беларускай Праваслаўнай Царквы.
Гэты абраз і яшчэ 17 гісторыка-культурных каштоўнасцяў (карціны, статуэткі, гадзіннікі) незаконна ўвозіліся з Польшчы і былі канфіскаваны брэсцкімі мытнікамі. Каштоўнасці канфіскаваныя па рашэнні суда. Па сумесным рашэнні мытні, упраўлення па Брэсцкай вобласці Дэпартамента па гуманітарнай дзейнасці Кіраўніцтва справамі Прэзідэнта Рэспублікі Беларусь і іншых зацікаўленых абраз стаў спадчынай праваслаўнай царквы.
Выраблены ў пачатку ХХ стагоддзя ў Расійскай імперыі, ён уяўляе сабой выявы святых Аляксандра Неўскага і Ніны і ў верхняй частцы — Ісуса Хрыста. На адваротным баку напісаны надпіс, які не цалкам захаваўся: «Гэты абраз набыты... 6 студзеня дня 1919 года на асабістыя сродкі Святы Алекс...».
Іншыя 17 прадметаў папоўняць фонды Нацыянальнага мастацкага і Нацыянальнага гістарычнага музеяў, а таксама Брэсцкага абласнога краязнаўчага музея.
