«Вопыт Другой сусветнай вайны дыктуе неабходнасць зрабіць усё для таго, каб будучым пакаленням не давялося перажыць новага супрацьстаяння. Нам бы хацелася, каб нямецкая дыпламатыя адыграла кансалідуючую, а не канфрантацыйную ролю ў аднаўленні адносін. А пакуль яе не відаць ад слова „зусім“. Беларусь адкрыта для аднаўлення ўзаемапаважлівага дыялогу з Германіяй, які дазволіў бы нам пачаць развязванне праблемных вузлоў не толькі ў двухбаковых адносінах, але і з Еўрапейскім саюзам у цэлым», — падкрэсліў Ігар Сякрэта.

Намеснік міністра замежных спраў таксама адзначыў, што захаванне гістарычнай памяці пра гераічнае мінулае беларускага народа і ўсіх народаў былога Савецкага Саюза — цэнтральная задача дзяржавы.

«Мы разглядаем гэту спадчыну як неад’емную частку нашай нацыянальнай ідэі, як цэментуючую аснову грамадства. Паколькі базіс нашай незалежнасці і суверэнітэту, захавання нацыянальнай ідэі і народа быў закладзены менавіта тады, калі нашы гераічныя продкі не далі рэалізавацца планам па стварэнні „жыццёвай прасторы“ для нямецкай нацыі і знішчэння большасці беларускага насельніцтва. Памяць аб трагедыі вайны — у аснове нашай міралюбнай знешняй палітыкі і стваральнай унутранай палітыкі, накіраванай на эвалюцыйнае развіццё дзяржавы», — заявіў намеснік міністра.

Ён упэўнены, што памяць і патрыятызм з’яўляюцца абавязкам кожнага грамадзяніна. Нават у краінах Балтыі і ва Украіне, дзе ўлады робяць усё магчымае для ліквідацыі «савецкіх» наратываў, дзе цынічна знішчаюцца воінскія пахаванні і помнікі героям, — і там мільёны людзей захоўваюць памяць пра вайну і подзвіг тых, хто ўратаваў свет ад фашызму.

«У рэшце рэшт значная частка літоўцаў, латышоў, эстонцаў і ўкраінцаў не падтрымала ў 1941 годзе ідэі нацыянал-сацыялізму. Вельмі многія прадстаўнікі гэтых нацыянальнасцей змагаліся з фашызмам на франтах Вялікай Айчыннай вайны і ў тыле, падтрымлівалі партызанскі рух і падполле. Аднак сённяшняя дзяржаўная ідэалогія ў гэтых краінах усё больш абапіраецца на нашчадкаў ветэранаў СС, якія ўсхваляюць сваіх продкаў як «вызваліцеляў ад камунізму», — звярнуў увагу беларускі дыпламат.