Беларусь вітае рашэнне ўладаў Польшчы аб аднаўленні працы закрытых раней двух пунктаў пропуску. Пра гэта заявіў журналістам прэс-сакратар МЗС Беларусі Руслан Варанкоў па выніках праведзенай па даручэнні Прэзідэнта нарады па сітуацыі на мяжы з дзяржавамі Еўрапейскага саюза.

Мерапрыемства прайшло пад кіраўніцтвам Прэм’ер-міністра Аляксандра Турчына і Дзяржаўнага сакратара Савета Бяспекі Рэспублікі Беларусь Аляксандра Вальфовіча пры ўдзеле кіраўнікоў МЗС, Дзяржпагранкамітэта, ДМК і КДБ.

— Беларусь паслядоўна заклікае еўрапейскіх суседзяў да аднаўлення ранейшага рэжыму працы мяжы ў інтарэсах простых грамадзян і развіцця трансгранічнага супрацоўніцтва. На гэтым фоне вітаем рашэнне ўладаў Рэспублікі Польшча аб аднаўленні працы закрытых раней двух пунктаў пропуску праз беларуска-польскую мяжу для перамяшчэння людзей, транспартных сродкаў і грузаў. Гэта рашэнне акажа станоўчы ўплыў перш за ўсё на прыгранічны гандаль, — сказаў прэс-сакратар.

У паведамленні МЗС адзначаецца, што гэты крок з’яўляецца праявай канструктыўнага стаўлення Польшчы, накіраваным перш за ўсё на спадзяванні ўласных грамадзян.

— На жаль, мы не назіраем аналагічнага падыходу з боку літоўскіх уладаў, якія працягваюць ігнараваць інтарэсы ўласных грамадзян, — дадаў Руслан Варанкоў.

Як паведамлялася раней, улады Польшчы маюць намер 17 лістапада аднавіць працу двух закрытых у папярэднія гады памежных пераходаў на мяжы з Беларуссю ў Баброўніках і Кузніцы. Адпаведнае распараджэнне выдаў кіраўнік польскага МУС Марцін Кервіньскі. З беларускага боку гэта Брузгі і Бераставіца.

Польскі бок 17 лістапада пачне прапускаць легкавыя аўтамабілі і аўтобусы праз КПП у Кузніцы, а праз КПП у Баброўніках — легкавыя аўтамабілі, аўтобусы і грузавікі з краін ЕС і Швейцарыі.

Данііл ХМЯЛЬНІЦКІ

фота БелТА