У час візіту міністра замежных спраў Беларусі Максіма Рыжанкова ў Лаос 17 красавіка бакі падпісалі міжурадавае пагадненне аб адмене віз для ўладальнікаў нацыянальных пашпартоў.

Разам з тым у МЗС падкрэслілі, што падпісанне пагаднення не азначае яго неадкладнага ўступлення ў сілу. «Для запуску бязвізавага рэжыму бакам неабходна прайсці шэраг унутрыдзяржаўных працэдур, уключаючы ратыфікацыю дакумента ва ўстаноўленым парадку. Гэтыя працэсы займаюць пэўны час», — растлумачылі ў ведамстве.

МЗС заклікала беларускіх грамадзян улічваць гэты факт пры планаванні паездак у Лаос і ўважліва сачыць за афіцыйнай інфармацыяй, якая будзе размяшчацца на рэсурсах міністэрства. Аб даце ўступлення пагаднення ў сілу ў ведамстве паабяцалі паведаміць дадаткова.