Алена Маргунова адзначыла, што традыцыя ўручэння знакаў якасці сапраўды атрымала новае дыханне па ініцыятыве кіраўніка дзяржавы. «У гэтым годзе мы ўжо трэці раз праводзім конкурс на Дзяржаўны знак якасці. На сённяшні дзень пададзена 260 заявак ад 150 прадпрыемстваў Рэспублікі Беларусь. Цяпер працуюць экспертныя камісіі, якія ацэньваюць прадукцыю па пяці крытэрыях, якія ўтвараюць наш „пяцівугольнік“ знака якасці. Гэта бяспека, экалагічнасць, тэхналагічнасць, інавацыйнасць і эстэтычнасць», — падкрэсліла яна.

Усе профільныя дзяржаўныя органы да 1 жніўня прадставяць свае экспертныя ацэнкі ў балах. Затым сакратарыят конкурснай камісіі вызначыць пераможцаў і прадставіць іх на рэспубліканскую атэстацыйную камісію, якая пройдзе восенню. Вынікі за 2026 год плануюць падвесці да кастрычніка.

Асобна Алена Маргунова адзначыла галасаванне спажыўцоў. Крытэрый «Эстэтычнасць» — гэта самая важная ацэнка, таму што тут галасуе менавіта спажывец. «Гэта візуалізацыя тавараў на паліцах, іх эстэтыка і эрганоміка. Пакупнік галасуе за той тавар, які яму найбольш прыемны візуальна, наколькі ён прадстаўлены на паліцы і наколькі правільна выбрана ўпакоўка. Галасаванне прадоўжыцца да 26 ліпеня. Кожны спажывец можа выбраць толькі адзін тавар. На сёння прагаласавалі ўжо больш як 33,5 тыс. чалавек, і мы спадзяёмся, што да канца ліпеня гэта лічба яшчэ вырасце», — дадала старшыня камітэта.