Адрадзіла гэтае старадаўняе рамяство на быхаўскай зямлі Ірына Генадзьеўна Кухціна, дырэктар Дзіцячай школы мастацкіх рамёстваў і мастацтваў г. Быхава, народны майстар Рэспублікі Беларусь, член Беларускага саюза майстроў народнай творчасці. Ірына Генадзьеўна — вядомы на Быхаўшчыне майстар, яна з вялікай увагай ставіцца да захавання рамесных традыцый свайго краю. Жанчына здолела захапіць сваім майстэрствам і навучэнцаў, і калег, а таксама актыўна ўзаемадзейнічае з мясцовымі жыхарамі. Яе знакамітыя павукі-абярэгі вядомыя не толькі ў нашай краіне, але і за яе межамі. У калекцыі больш чым 100 традыцыйных саламяных абярэгаў — вялікіх і маленькіх, простых і складаных, але заўсёды не падобных адзін на аднаго. Некаторыя з іх аб’яднаны ў калекцыі. Напрыклад, «Святочныя павукі», «Вялікія і маленькія», «Захавальнікі вясковых дамоў» і інш.

Даўняе сяброўства звязвае Гарадскую бібліятэку мікрараёна Быхаў-1 і Дзіцячую школу мастацкіх рамёстваў і мастацтваў г. Быхава. Установы цесна і плённа супрацоўнічаюць, сумесна праводзяць розныя асветніцкія мерапрыемствы, якія заўсёды дапаўняюцца майстар-класамі па розных кірунках дэкаратыўна-прыкладной творчасці. Зусім нядаўна бібліятэка арганізавала творчую сустрэчу народнага майстра Беларусі з навучэнцамі СШ № 2 г. Быхава, на якой Ірына Генадзьеўна з задавальненнем дзялілася сваімі ведамі і ўменнямі. Дзеці пазнаёміліся з гісторыяй узнікнення саломапляцення, відамі і тэхналогіяй вырабу канструкцый з саломкі.

У канцы мерапрыемства Ірына Генадзьеўна правяла экскурсію па школе рамёстваў. Дзеці з задавальненнем разглядалі работы вопытных майстроў і іх вучняў. Бібліятэкары ў сваю чаргу пазнаёмілі дзяцей з кнігамі пра розныя віды народных рамёстваў Беларусі: пляценне з саломкі і лазы, ткацтва, разьба па дрэве, ганчарства, вышыўка, бондарства. Авалоданне рамяством для кагосьці можа стаць пасля прафесіяй.

Таццяна КАВАЛЁВА