З 6 ліпеня па 30 жніўня ў сувязі з правядзеннем работ па рэканструкцыі моста цераз раку Свіслач на ўчастку пр. Незалежнасці ад вул. Янкі Купалы да пл. Перамогі ўводзяцца абмежаванні для руху ўсіх відаў транспартных сродкаў, за выключэннем грамадскага транспарту.

Аб’езд гэтага ўчастка магчымы па 1-м і 2-м транспартным кольцах, а таксама па вуліцах цэнтральнай часткі горада, якія прылягаюць да праспекта Незалежнасці.

На шэрагу ўчасткаў вулічна-дарожнай сеткі будзе зменена схема арганізацыі дарожнага руху. Новымі схемамі прадугледжана арганізацыя левага павароту: з пр. Машэрава на вул. Куйбышава (пры руху з боку пр. Незалежнасці), з пр. Машэрава на вул. Максіма Багдановіча (пры руху з боку пр. Незалежнасці), з пр. Незалежнасці на вул. Казлова (пры руху з боку пл. Якуба Коласа), з вул. Янкі Купалы на пр. Незалежнасці (пры руху з боку вул. Першамайскай).

У ДП «Гардарбуд» падкрэслілі, што прадпрыемства абавязуецца выканаць рамонтныя работы да заканчэння канікулярнага перыяду. Асноўная задача — зрабіць хутка, якасна і з найменшай шкодай для горада.

У Дзяржаўтаінспекцыі просяць удзельнікаў дарожнага руху ўлічваць дадзеную інфармацыю пры выбары маршруту.