Галоўны старт сезона сабраў у Казахстане больш за 800 барцоў з усяго свету, у склад беларускай каманды ўвайшлі 17 спартсменаў. Першымі на дыван з 24 па 27 кастрычніка выйдуць прадстаўнікі грэка-рымскага стылю, у тым ліку нашы Аляксандр Гур’еў (да 55 кг), Аляксандр Лявончык (да 72 кг), Шуай Мамедаў (да 77 кг), Ігар Ярашэвіч (да 87 кг), а таксама бронзавыя прызёры мінулагодняга ЧС Кірыл Маскевіч (да 97 кг) і Павел Глінчук (да 130 кг).

З 27 па 30 кастрычніка спаборнічаць у Астане будуць дзяўчаты, сярод удзельніц беларускі Наталля Варакіна (да 50 кг), Вераніка Іванова (да 62 кг), Настасся Зімянкова (да 76 кг) і трохразовая чэмпіёнка Еўропы і медалістка Алімпіяды Ірына Курачкіна (да 57 кг).

Барцы вольнага стылю вызначаць мацнейшых з 29 кастрычніка па 1 лістапада. Нашу краіну прадставяць Арыян Цютрын (да 57 кг), Дзмітрый Шамела (да 61 кг), Іслам Гусейнаў (да 65 кг), Мікіта Дзмітрыеў (да 74 кг), прызёр Алімпійскіх гульняў Магамедхабіб Кадзімагамедаў (да 79 кг), Аляксандр Гуштын (да 97 кг) і Дзяніс Храмянкоў (да 125 кг).