На міжнароднай гандлёвай пляцоўцы eBay выстаўлена рэдкая залатая манета з Беларусі — за $2750 (каля 8228 рублёў па курсе Нацбанка), паведамляе «Мінская Праўда».
Пакупніку прыйдзецца таксама аплаціць дастаўку — каля $40 (119 рублёў).
Што за манета?
Гаворка ідзе пра калекцыйную манету серыі «Зімовыя віды спорту. Фрыстайл», выпушчанай Нацыянальным банкам Беларусі 1 лістапада 2018 года. Вага вырабу — 7,78 грама чыстага золата, якасць чаканкі — вышэйшая. Да манеты дадаецца арыгінальны сертыфікат сапраўднасці ад Нацбанка.
Першапачатковы кошт манеты ў 2018 годзе складаў 990 рублёў (прыкладна $470 па курсе таго часу), але ўвесь тыраж — усяго 350 экзэмпляраў — быў хутка раскуплены.
Што кажуць эксперты?
Па словах нумізмата Сяргея Калбуна, запрошаная цана цалкам абгрунтаваная:
«Манета вельмі класная, цана адпавядае рэчаіснасці, улічваючы яшчэ і вельмі малы тыраж — усяго 350 экзэмпляраў. Дадзеную манету цяжка знайсці на рынку, усе падобныя вырабы сыходзяць у прыватныя калекцыі. Такія рэдкія і каштоўныя манеты пры выпуску ў свабодны продаж практычна не трапляюць, яны браніруюцца загадзя. У манеце толькі золата 7,78 грама, што на рынку складае $900. Увогуле, гэта манета, безумоўна, каштуе сваіх грошай», — растлумачыў спецыяліст.
