Інфармацыя пра гэта з’явілася неўзабаве пасля звальнення міністра. Гэта першы суіцыд чыноўніка такога высокага рангу за ўсю гісторыю сучаснай Расіі.

Старавойт здзейсніў самагубства на фоне крымінальнай справы аб крадзяжах пры будаўніцтве абарончых збудаванняў у Курскай вобласці. Па словах крыніцы Shot, на яго даў паказанні галоўны фігурант гэтай справы Аляксей Смірноў — былы намеснік і пераемнік Старавойта ў Курскай вобласці.

Старавойту магло пагражаць да 20 гадоў калоніі па двух артыкулах.
Цела экс-міністра знайшлі на паркоўцы каля парку Малевіча ў падмаскоўным Адзінцова. Па адной з версій, ён здзейсніў самагубства ў сваім аўтамабілі маркі Tesla, па іншай — непадалёк ад яго. Побач з целам Старавойта ляжаў узнагародны пісталет.

За некалькі гадзін да гэтага прэзідэнт Расіі Уладзімір Пуцін звольніў Старавойта з пасады міністра транспарту і прызначыў часова выконваючым яго абавязкі былога кіраўніка Наўгародскай вобласці Андрэя Нікіціна. У Крамлі адзначалі, што адстаўка міністра не звязана са стратай даверу. Яшчэ 2 ліпеня Старавойт выступаў перад Пуціным з дакладам на тэму развіцця сеткі аэрапортаў.

Былы віцэ-прэзідэнт Расіі і экс-губернатар Курскай вобласці Аляксандр Руцкой назваў Старавойта «добрым чыноўнікам» і выказаў меркаванне, што ён мог пакончыць з сабой «з гонару». Ён лічыць, што экс-кіраўніка Мінтранса ўцягнуў у крымінальную справу аб крадзяжы былы губернатар Аляксей Смірноў, які раней быў яго намеснікам. Прытым Руцкой не верыць, што Старавойтащ сапраўды мог пайсці на злачынства і вырашыўся звесці рахункі з жыццём, каб захаваць свой гонар.

Пры гэтым некаторыя расійскія аглядальнікі, у тым ліку ваенкары, не выключаюць і інсцэніроўку самагубства.