Гэтаму пасадзейнічала павелічэнне колькасці ўдзельнікаў таргоў з гэтага рэгіёна Расіі, а таксама пашырэнне наменклатуры тавараў, што рэалізуюцца ў рамках біржавых кантрактаў паміж беларускімі і наўгародскімі кампаніямі. Такой інфармацыяй падзяліўся намеснік начальніка ўпраўлення знешнеэканамічнай дзейнасці БУТБ Герман Пузырны ў час анлайн-семінара для дзелавых колаў Наўгародскай вобласці, арганізаванага ў супрацоўніцтве з Наўгародскім фондам падтрымкі малога прадпрымальніцтва.

«Сярод асноўных фактараў, якія забяспечылі дадатную дынаміку біржавога тавараабароту з Наўгародскай вобласцю, трэба адзначыць выхад на таргі пяці новых кампаній з рэгіёна, якія практычна адразу ўключыліся ў работу на нашай пляцоўцы, а таксама з’яўленне ў структуры ўзаемнага гандлю дадатковых пазіцый — піламатэрыялаў ліставых парод і фосфарыстай медзі. Першая запатрабавана ў наўгародскіх прадпрыемстваў, а другая — у беларускіх. Акрамя таго, на павышэнне паказчыкаў продажаў істотна паўплывалі ўсё большыя пастаўкі беларускіх мясапрадуктаў, а менавіта замарожаных паўфабрыкатаў з ялавічыны», — расказаў Герман Пузырны.

Дырэктар Цэнтра падтрымкі экспарту Наўгародскай вобласці Аляксей Сырнікаў адзначыў важную ролю такіх механізмаў, як біржа ў развіцці міжрэгіянальнага гандлю і выбудоўванні доўгатэрміновых кааперацыйных сувязей паміж наўгародскімі і беларускімі прадпрыемствамі, а таксама выказаў гатоўнасць паглыбляць супрацоўніцтва з БУТБ па ўсіх напрамках, якія ўяўляюць узаемны інтарэс.

«Вядома ж, для нас прыярытэтнае значэнне мае прасоўванне прадукцыі наўгародскіх вытворцаў на рынак Беларусі, таму на гэтым напрамку ўзаемадзеяння мы хацелі б засяродзіць асаблівую ўвагу. Дваццаці пяці акрэдытаваных на БУТБ наўгародскіх кампаній недастаткова для рэалізацыі экспартнага патэнцыялу нашага рэгіёна. Сённяшні анлайн-семінар можна лічыць першым крокам у нашым супрацоўніцтве з біржай, а ў перспектыве мы гатовы праводзіць такія мерапрыемствы на рэгулярнай аснове», — заявіў кіраўнік рэгіянальнага цэнтра падтрымкі экспарту.

ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных біржаў ва Усходняй Еўропе. Яе галоўная функцыя — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.