Галаўное прадпрыемства акцыянернага таварыства ў Лідзе наведвае Прэм’ер-міністр Беларусі Аляксандр Турчын. Кіраўнік урада азнаёміўся з вытворчымі магутнасцямі прадпрыемства. Прадметная размова аб развіцці малочнай галіны прадоўжылася на пляцоўцы прадпрыемства пад кіраўніцтвам Прэм’ер-міністра.  

Як расказаў галоўны інжынер Лідскага малочна-кансервавага камбіната Аляксандр Варабей, у ААТ — як на галаўной пляцоўцы, так і ў філіялах — вядзецца маштабная мадэрнізацыя. Да 2030 года ў ААТ плануюць нарасціць аб’ём перапрацоўкі малака прыкладна на 50 працэнтаў. «У прыватнасці, калі цяпер на Лідскім малочна-кансервавым камбінаце перапрацоўваем 603 т малака за суткі, то пасля правядзення мадэрнізацыі, да 2028 года, плануем павялічыць перапрацоўку яшчэ на 300 т за суткі, — падзяліўся планамі Аляксандр Варабей. — Рэгулярнага росту і абнаўлення патрабуе высокая канкурэнцыя на сусветным рынку. Толькі такім шляхам можна атрымаць высакаякасны прадукт, які адпавядае запытам».

Галоўны інжынер расказаў аб ходзе рэалізацыі праекта «Канцэнтрат малочнага бялку» на камбінаце. Цяпер вядуцца будаўніча-мантажныя работы, якія пачаліся ў канцы мая. Ужо пастаўлена тэхналагічнае абсталяванне на суму 11,5 млн еўра, да канца чэрвеня чакаецца поўная пастаўка неабходнага абсталявання. Запуск вытворчасці запланаваны на 2028 год.

«Новае абсталяванне дасць нам магчымасць выконваць больш паглыбленую перапрацоўку малака, атрымаць дзякуючы гэтаму новую для Беларусі імпартазамяшчальную прадукцыю — канцэнтрат малочнага бялку», — растлумачыў Аляксандр Варабей.

Яшчэ адзін актуальны праект, над якім пачалі працаваць у Лідзе, — вытворчасць абязводжанага малочнага тлушчу. Паводле слоў галоўнага інжынера, гэта альтэрнатыва сметанковаму маслу. У гэтым прадукце больш за 99 працэнтаў тлушчу. Рэалізацыя яго нацэлена на краіны Афрыкі.

У гэтым годзе на прадпрыемстве запусцяць лінію па разліве малака і пітных ёгуртаў у бутэльку, пуск намечаны на IV квартал бягучага года.

Інвестыцыйнае развіццё ідзе і ў філіялах ААТ. «На Ашмянскім сыраробным заводзе гэта фасоўка сыру з фіксаванай вагой у выглядзе слайсаў з інтэрліверам і без інтэрлівера, „стосікам“, „у елачку“, „лесвіцай“. У філіяле „Смаргонскія малочныя прадукты“ гэта новая лінія марожанага, лінія ўпакоўкі тварагу ў трохшыўны пакет з мадыфікаваным газавым асяроддзем, што дасць нам магчымасць павялічыць тэрміны прыдатнасці гэтага прадукта і пашырыць геаграфію паставак. У „Навагрудскіх дарах“ гэта запуск сырнай лініі з дадатковай вытворчасцю 10 т сыру за суткі. Плюс амбіцыйны праект у Любчанскім вытворчым цэху — вытворчасць сыроў з высакароднай блакітнай цвіллю. Гэты прадукт асабліва папулярны ў моладзі. Арыентуемся на пастаўкі ў Расію і іншыя краіны постсавецкай прасторы», — расказала выконваючы абавязкі генеральнага дырэктара ААТ «Лідскі малочна-кансервавы камбінат» Ірына Філіпава.