— Горад атрымае новы цікавы аб’ект, які стане напамінам аб багатай гісторыі Мінска і яго старажытных каранях — памятны знак аб найстаражытнейшым умацаванні і храме, — падзяліўся Вадзім Лакіза. — Акрамя таго, да свята горада Інстытут гісторыі НАН рыхтуе калектыўную манаграфію аб Мінскім замчышчы. Выдавецтва «Беларуская навука» ўжо завяршае над ёй працу. У кнізе сабраны ўнікальныя даследаванні, дакументы і адкрыцці, прысвечаныя нашай сталіцы.

Што датычыцца аднаўлення гістарычнага раёна, размешчанага каля Палаца спорту і ўздоўж вуліцы Нямігі, то цяпер яго рэканструкцыя не плануецца.

— Адзін з кірункаў працы археолагаў - выратавальныя (ахоўныя) даследаванні. Яны праводзяцца Інстытутам гісторыі НАН сумесна з нашымі калегамі з ВНУ. Краіна развіваецца, выконваюцца земляныя, будаўнічыя, меліярацыйныя работы. І наша задача ў рамках дзеючага заканадаўства - распрацоўка і выкананне мер па ахове археалагічнай спадчыны. Мы ажыццяўляем археалагічную экспертызу і здабываем старажытныя артэфакты з культурных слаёў, асабліва ў тых выпадках, калі спыніць будаўніцтва немагчыма, — паведаміў Вадзім Лакіза.