Памятны знак або скульптуру, прысвечаную гісторыі Мінска, плануюць устанавіць у раёне Нямігі. Улады горада аб’явілі конкурс эскізных праектаў «з мэтай пошуку найбольш выразнага вобразнага рашэння».

Мяркуецца, што гэты аб’ект «сродкамі манументальнага мастацтва дазволіць адлюстраваць гісторыю горада Мінска з ХII стагоддзя па сучасны час з аб’ёмнай і рэльефнай выявай знакавых падзей, гістарычных асоб».

Для ўдзелу ў ім запрашаюцца аўтары ці аўтарскія калектывы, якія складаюцца са скульптараў, архітэктараў, мастакоў, спецыялістаў па старажытнабеларускай архітэктуры.

• Заяўкі прымаюцца да 21 мая 2025 года ўключна, конкурсныя матэрыялы — не пазней за 6 чэрвеня. Журы выбера пераможцу на закрытым пасяджэнні не пазней за 13 чэрвеня.

Заказчыкам скульптуры будзе КУП «Мінская спадчына». Грошы на яе стварэнне выдзеляць з бюджэту Мінска.