Таксама ў праграме рабочай паездкі — нарада па пытанні развіцця айчыннага легкавога аўтамабілебудавання. На парадку дня — пытанні дзейнасці СЗАТ «БелДжы», абмеркаванне перспектыў развіцця яшчэ аднаго прадпрыемства па вытворчасці легкавых аўтамабіляў у Беларусі — СП ЗАТ «Юнісон».

Акрамя таго, кіраўнік беларускага ўрада наведаў завод па вытворчасці цэментава-перлітавых панэляў у Жодзіне з аб’ектамі інжынерна-транспартнай (унутрыпляцовачнай і магістральнай) інфраструктуры. Інвестыцыйны праект рэалізуе ТАА «Карпарацыя ВОЛМА БЕЛ». Тэрмін завяршэння рэалізацыі праекта згодна з інвестыцыйным дагаворам — снежань 2027 года.

СЗАТ «БелДжы» па выніках першага квартала 2026 года выраблена 22 359 аўтамабіляў (тэмп росту — 107,8 %). На экспарт пастаўлена 15 492 адзінкі (тэмп росту — 137,7 %) на суму 251,9 мільёна долараў. На ўнутраным рынку рэалізавана 8612 адзінак (тэмп росту — 130 %), у тым ліку на новых відах энергіі — 3006 адзінак.

У першым квартале 2026 года ў вытворчасці знаходзяцца чатыры мадэлі BELGEE і шэсць мадэляў GEELY, у тым ліку тры мадэлі на новых відах энергіі.

Як расказаў журналістам дырэктар СЗАТ «БелДжы» Генадзь Свідзерскі, прадпрыемства ў красавіку прадставіць удасканаленую мадэль аўто, якая атрымала Дзяржаўны знак якасці, — новы аўтамабіль BELGEE X50+:

— Вы памятаеце, што наш завод атрымаў Дзяржзнак якасці па BELGEE X50. Гэта самая масавая машына. Яна палюбілася і ў Беларусі, і ў Расіі. Але цяпер ёсць мадэрнізаваная версія гэтай машыны BELGEE X50+. Там ужо новая электроніка, чатырохцыліндравы рухавік. У красавіку нашы пакупнікі ўбачаць новую машыну. Усе неабходныя выпрабаванні мы ўжо правялі, і машыны гатовыя да серыйных паставак.

Акрамя таго, «БелДжы» 3 красавіка вывеў на рынак новую мадэль Geely Cityray. 

— Яна цяпер ёсць ва ўсіх салонах. Гэта ўжо машына на новай платформе. Думаю, што яна спадабаецца нашым спажыўцам, — адзначыў дырэктар прадпрыемства.

Першы квартал бягучага года для «БелДжы» склаўся паспяхова. 

— Гэта вынік завяршэння першага этапу мадэрнізацыі. Мы павялічылі аб’ёмы вытворчасці ў параўнанні з мінулым годам. Павялічылі экспарт. Добры попыт на расійскім рынку. А з самых значных падзей на беларускім рынку — павелічэнне попыту і продажаў электрамабіляў і гібрыдаў. Далей плануем выконваць бягучае даручэнне ўрада — арганізоўваць другі этап мадэрнізацыі, — пазначыў Генадзь Свідзерскі.

Як расказаў галоўны тэхнолаг завода Сяргей Традчык, цэх штампоўкі з’явіцца на СЗАТ «БелДжы» ў 2027 годзе. 

— Калі будаваўся завод, у нас было першапачаткова запланаваны дзве чаргі. Першая чарга — гэта зварка, афарбоўка, зборка, другая — укараненне штамповачнай вытворчасці. Цяпер мы займаемся гэтым. У канцы 2027 года павінны будзем рэалізаваць другую чаргу завода, — сказаў Сяргей Традчык.

На рэалізацыю праекта па будаўніцтве штамповачнага цэха адводзіцца 21 месяц.

Галоўны тэхнолаг таксама праінфармаваў аб мадэрнізацыі дзеючых цэхаў. 

— Летась мы правялі мадэрнізацыю ў цэху зваркі, дадалі пяць робатаў. І ў цэху афарбоўкі таксама — аўтаматызавалі працэсы, дадалі 33 робаты. Перавага робататэхнічных комплексаў у тым, што яны выконваюць усе аперацыі вельмі дакладна. Паўтаральнасць працэсаў у іх фактычна ідэальная, не ўплывае чалавечы фактар, — пазначыў ён.

Як дадаў Генадзь Свідзерскі, завод працуе на мяжы магутнасцяў, 12 гадзін без выхадных. 

— Таму адна з тэм, якія даручаны нам урадам, — пашырэнне магутнасці і павышэнне лакалізацыі. Завод быў спраектаваны на магутнасць 60 тысяч машын пры двухзменным рэжыме працы. Мы перад сабой ставім задачу выйсці на 120 тысяч. Летась павялічылі магутнасць афарбоўкі да 120 тысяч, павысілі хуткасць на зварцы. А зараз запланаваны работы па будаўніцтве цэха штампоўкі, — сказаў ён.

Дырэктар прадпрыемства таксама растлумачыў важнасць з’яўлення новага цэха. 

— Калі мы скарачаем транспартныя выдаткі, пачнём дэталі механічна вырабляць у сябе, то поўны тэхналагічны цыкл дазволіць нам эканоміць на лагістыцы і вытворчасць стане больш эфектыўнай. Наогул класічную вытворчасць легкавых аўтамабіляў трэба пачынаць з металічнага ліста і заканчваць гатовым аўтамабілем. У нас ужо ўкаранёны працэсы зваркі, афарбоўкі, зборкі, а цэх штампоўкі дазволіць нам значна скараціць лагістычныя выдаткі. У Беларусі пакуль няма сучаснай, струменевай, рабатызаванай, буйнагабарытнай штампоўкі. Таму гэты праект важны ў цэлым для краіны, — сказаў на заканчэнне Генадзь Свідзерскі.

Па матэрыялах БелТА