Адным з асноўных пытанняў пасяджэння сесіі стала кадравае забеспячэнне арганізацый Мінска — тэмы, актуальнай для ўсіх рэгіёнаў краіны.

«Было даручэнне кіраўніка дзяржавы аб замацаванні кадраў на месцах, таму на абмеркаванне сесіі вынесена гэта пытанне. Яго разглядалі і на пасяджэнні Мінгарвыканкама. Сёння асноўную ўдзельную вагу ў агульнай лічбе вакансій складаюць прадпрыемствы прамысловасці (больш за 20 %), ёсць неабходнасць у кадрах у такіх галінах, як гандаль, будаўніцтва і ахова здароўя», — адзначыла Святлана Кажэкіна.

Для вырашэння пытання кадравага забеспячэння, паводле слоў спецыяліста, у сталіцы актыўна прыцягваюць да работы замежнікаў. «Многія прамысловыя прадпрыемствы заключаюць дагаворы па абмене і прыёме на работу замежных грамадзян. Іх цяпер у Мінску працуе каля 22 тыс.», — падкрэсліла Святлана Кажэкіна.

Трэба адзначыць, што ў Рэспубліцы Беларусь прадугледжана адказнасць наймальнікаў за прыцягненне замежных грамадзян, акрамя грамадзян дзяржаў ЕАЭС, што замацавана ўказам № 202 ад 21 мая 2025 года «Аб павышэнні ролі наймальнікаў у галіне знешняй працоўнай міграцыі». Дакумент ускладае на работадаўцаў дадатковыя абавязкі, такія як арганізацыя моўнага тэсціравання, кантроль за ўмовамі пражывання і абавязковае заключэнне працоўнага дагавора на працягу 30 дзён пасля ўезду работніка.

У якасці дадатковай меры для вырашэння пытанняў кадравага забеспячэння ў сталіцы да 1 студзеня 2026 года плануюць распрацаваць комплексную праграму па замацаванні кадраў і аб кадравым патэнцыяле.

«Акрамя гэтага, плануецца вызначыць пералік задач, якія будуць стаяць перад кіраўнікамі прадпрыемстваў. Мы спадзяёмся, што карціна, якая склалася па Мінску, будзе толькі паляпшацца і дапамагаць нашым арганізацыям запаўняць вакансіі», — расказала Святлана Кажэкіна.