Гэтымі днямі ва Узброеных Сілах нашай краіны праходзіла лётна-тактычнае вучэнне з авіяцыйнымі воінскімі часцямі. Для яго правядзення былі задзейнічаны ваенныя аэрадромы і палігоны Ваенна-паветраных сіл і войскаў супрацьпаветранай абароны Узброеных Сіл Рэспублікі Беларусь. 

У ходзе паветраных манеўраў асноўная ўвага ўдзялялася ўдасканаленню камандзірскай вывучцы і практычных навыкаў лётных экіпажаў пры вядзенні баявых дзеянняў, выпрацоўцы ў асабовага складу высокіх баявых і маральна-псіхалагічных якасцяў. На вучэннях адпрацоўваліся ў тым ліку пытанні вываду авіяцыйных падраздзяленняў з-пад умоўнага ўдару сродкаў паветранага нападзення праціўніка, авіяцыйнай падтрымкі войскаў, якія ажыццяўляюць пошук, блакіраванне і знішчэнне наземнага праціўніка.

Асаблівая ўвага была ўдзелена пытанням нанясення авіяўдараў па наземных і выяўленых цэлях, знішчальнага прыкрыцця іншых родаў авіяцыі, вядзення паветранай разведкі, выканання транспартна-дэсантных задач, адбіцця ўдараў сродкаў паветранага нападу праціўніка, а таксама эвакуацыі лётнага саставу, які пацярпеў бедства. Не абышлося і без праверкі зладжанасці дзеянняў лётных экіпажаў з наземнымі службамі забеспячэння, а таксама адпрацоўцы пытанняў узаемадзеяння з іншымі родамі войскаў. Ва ўмовах, максімальна набліжаных да баявых, правяралася гатоўнасць асабовага складу да выканання пастаўленых задач. Вучэнне дало магчымасць ацаніць эфектыўнасць прымянення новых тактычных прыёмаў, а таксама выявіць шляхі далейшага ўдасканалення сістэмы падрыхтоўкі лётнага складу.

У ходзе лётна-тактычных вучэнняў 50-я змешаная авіяцыйная база, пад камандаваннем палкоўніка Аляксандра Бяляева, прадэманстравала высокі ўзровень падрыхтоўкі і гатоўнасць да выканання самых складаных задач. Асаблівасцю гэтых вучэнняў стала работа авіяцыі па-за пунктамі пастаяннага базіравання, што дало магчымасць адпрацаваць шырокі спектр задач, уключаючы баявое прымяненне на розных палігонах.

Паводле слоў палкоўніка Аляксандра Бяляева, асаблівая ўвага надзялялася тылавому забеспячэнню авіяцыі, падвозу матэрыяльных сродкаў і ўзбраенню на іншыя аэрадромы. У вучэннях была задзейнічана максімальная колькасць авіяцыйнай тэхнікі і асабовага складу базы.

— Важную ролю адыгрываюць найноўшыя транспартна-баявыя верталёты Мі-35М, якія валодаюць высокай агнявой моцай і манеўранасцю, — адзначыў ён. — Пры правядзенні практычных эпізодаў улічваўся вопыт спецыяльнай ваеннай аперацыі. Экіпажы адпрацоўвалі тактыку працы без уваходу ў зону паражэння зенітна-ракетных сродкаў суперніка, нанясенне ўдару з вялікіх далёкасцяў і ўдар па групавых цэлях. Таксама адпрацоўваліся эпізоды выратавання экіпажаў, якія пацярпелі бедства. Асноўны ўпор у ходзе вучэнняў рабіўся на падрыхтоўку маладога лётнага складу. Увесь авіяцыйны персанал базы павінен быць гатовы да выканання баявых задач у любых умовах.

Падобныя мерапрыемствы даюць магчымасць не толькі праверыць гатоўнасць асабовага складу, але і прадэманстраваць высокі ўзровень прафесіяналізму беларускіх ваенных лётчыкаў, здольных эфектыўна абараняць паветраныя рубяжы Радзімы.

Алег НЯКАЛА

Фота аўтара