На якіх рэках Беларусі ўжо з’явілася ледзяное покрыва, расказалі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды, паведамляе БелТА.
«Па стане на 5 студзеня, на большасці рэк басейнаў Заходняй Дзвіны, Дняпра, Сожа, Прыпяці, а таксама на асобных участках рэк басейнаў Нёмана, Віліі і Бярэзіны адзначаецца ледастаў і ледастаў з палонкамі. На вадасховішчах Чыгірынскае, Заслаўскае, Вілейскае, Салігорскае, Чырвоная Слабада, азёрах Нарач, Лукомскае, Дрывяты і Чырвонае назіраецца ледастаў і ледастаў няпоўны», — расказалі ў Белгідрамеце.
На рэках адзначаюцца ваганні ўзроўняў вады, месцамі рэзкія (да 41 см за суткі), абумоўленыя зажорамі лёду. На Віліі ля аграгарадка Сцешыцы, прытоку Бярэзіны рацэ Свіслач каля вёскі Церабуты і прытоку Прыпяці рацэ Пціч каля вёскі Першая Слабодка ўзроўні вады перавышаюць адзнакі выхаду вады на пойму.
Па прагнозах гідролагаў, у бліжэйшыя дні ледаўтварэнне на рэках працягнецца, на Бярэзіне каля Беразіно і Сожы каля Слаўгарада магчымы выхад вады на пойму.
