На якія мэты накіроўваюцца сродкі дзяржаўнай праграмы па пераадоленню наступстваў катастрофы на Чарнобыльскай АЭС, расказаў на прэс-канферэнцыі першы намеснік начальніка Дзяржатамнагляду Леанід Дзядуль, паведамляе БелТА.

«На гэтым тыдні 39-я гадавіна чарнобыльскай катастрофы, і мы пачалі ўжо рыхтавацца да 40-й гадавіны гэтай трагічнай падзеі. Па-ранейшаму асноўныя намаганні дзяржавы накіраваны на зніжэнне радыяцыйнай рызыкі для здароўя грамадзян, стварэнне нармальных умоў жыццядзейнасці, у тым ліку для тых, хто пражывае на забруджаных тэрыторыях», — адзначыў Леанід Дзядуль.

У краіне рэалізуецца ўжо шостая дзяржаўная праграма па пераадоленні наступстваў катастрофы на Чарнобыльскай АЭС. «Каля 60% сродкаў па праграме накіроўваецца менавіта на сацыяльную падтрымку грамадзян. Гэта льготы, бясплатнае харчаванне дзяцей, санаторна-курортнае аздараўленне. Каля 22% ад усяго аб’ёму сродкаў ідзе на пытанні радыяцыйнай абароны, звязаныя з атрыманнем нарматыўна чыстай прадукцыі, з кантролем утрымання радыенуклідаў, выкананнем адпаведных мерапрыемстваў. Таксама сродкі накіроўваюцца на сацыяльна-эканамічнае развіццё. Сёння можна казаць нават не аб аднаўленні, а аб развіцці тэрыторый, якія пацярпелі ў выніку аварыі на ЧАЭС. Ужо ацэнены ўсе рызыкі, зразумелы парадак дзеянняў», — адзначыў першы намеснік начальніка Дзяржатамнагляду.

Паводле яго слоў, выдаткі рэспубліканскага бюджэту на пераадоленне наступстваў аварыі паступова скарачаюцца. «У пачатку 1990-х доля даходзіла да 22% бюджэту краіны. У наступныя пяцігодкі — да 11%. З пачатку 2000-х мы ацэньвалі гэтыя лічбы каля 3% бюджэту, а сёння крыху больш за 1%. Пры гэтым ухіл у большай ступені робіцца на сацыяльную абарону. Дзяржава клапоціцца аб грамадзянах», — падкрэсліў Леанід Дзядуль.

Фота: БелТА