Прыём дакументаў у ВНУ ад абітурыентаў, якія паступаюць на бюджэтныя месцы, завершаны 17 ліпеня. Пры плане прыёму на бюджэт 33,1 тыс. дакументы падалі каля 52,7 тыс. абітурыентаў. Раней залічана каля 5,6 тыс. мэтавікоў і каля 400 пераможцаў універсітэцкіх алімпіяд.

«Па выніках падачы дакументаў больш як 5,1 тыс. абітурыентаў прэтэндуюць на залічэнне без уступных іспытаў (пераможцы міжнародных і рэспубліканскіх алімпіяд, уладальнікі залатых (сярэбраных) медалёў школ і дыпломаў каледжаў з адзнакай, выпускнікі Нацыянальнага дзіцячага тэхнапарка, профільных класаў і іншыя ), больш за 900 — па-за конкурсам. Высокія конкурсы, а гэта больш як 5 чалавек на месца, адзначаны па спецыяльнасцях «графічны дызайн і мультымедыядызайн», «прыкладная фізіка», «правазнаўства», — праінфармавалі ў ведамстве.

Па шэрагу спецыяльнасцей абітурыенты падалі дакументы з сумай балаў больш за 390, сярод іх «праграмная інжынерыя», «міжнародная эканоміка і гандаль», «міжнародныя адносіны», «эканамічная інфарматыка», «прыкладная фізіка».

Адзначана, што запатрабавана падрыхтоўка спецыялістаў з вышэйшай адукацыяй у рэгіянальных ВНУ. «Пры плане прыёму на бюджэт 15,5 тыс. месцаў дакументы падалі 20,7 тыс. абітурыентаў. Найбольшыя конкурсы — у Палескім дзяржаўным універсітэце, Гродзенскім дзяржаўным універсітэце імя Я.Купалы, Віцебскім дзяржаўным універсітэце імя П.М.Машэрава, Гомельскім дзяржаўным універсітэце імя Ф.Скарыны», — канстатавалі ў прэс-службе.

Залічэнне першакурснікаў на бюджэтныя месцы адбудзецца па 27 ліпеня. Інфармацыя аб залічэнні будзе размешчана на інфармацыйных рэсурсах ВНУ і ў асабістых кабінетах абітурыентаў.

Прадаўжаецца прыём на платнае навучанне па 1 жніўня (у сельскагаспадарчых ВНУ па 2 жніўня). План прыёму абітурыентаў-платнікаў складае 16,1 тыс. месцаў.