«Пацыент можа збіраць сродкі на любое захворванне, якое ўваходзіць у МКБ-10. Беларусь працуе згодна з Міжнароднай класіфікацыяй хвароб 10-га перагляду», — сказала Святлана Тулупава.

Начальнік юрыдычнага ўпраўлення Міністэрства аховы здароўя Вольга Змітровіч адзначыла, што фізічнай асобе для адкрыцця дабрачыннага рахунку неабходна прадаставіць у банк медыцынскія дакументы, якія пацвярджаюць наяўнасць захворвання ў чалавека, які мае патрэбу ў аказанні медыцынскай дапамогі.

«Медыцынскія дакументы выдаюцца ў адпаведнасці з заканадаўствам аб адміністрацыйных працэдурах. Як правіла, гэта медыцынская даведка аб стане здароўя, выпіска з медыцынскіх дакументаў, якія выдаюцца пры прад’яўленні дакументаў, што пацвярджаюць асобу», — сказала яна, дадаўшы, што на сайце Міністэрства аховы здароўя размешчана кароткая інфармацыя аб гэтых дакументах.

Вольга Змітровіч заўважыла, што паводле заканадаўства аб адміністрацыйных працэдурах медыцынская даведка выдаецца на працягу аднаго дня. Яна выдаецца, як правіла, адразу ж пры звароце грамадзяніна. Выпіску з медыцынскіх дакументаў павінны выдаць на працягу пяці дзён. На практыцы гэта адбываецца значна хутчэй. 

Меддаведка сапраўдная адзін год, выпіска выдаецца на перыяд ад 2 да 5 гадоў або бестэрмінова ў залежнасці ад дыягназу, які выстаўлены пацыенту, дадала Святлана Тулупава.

Паводле слоў начальніка юрыдычнага ўпраўлення, форма гэтых дакументаў устаноўлена пастановамі Міністэрства аховы здароўя. Дакументы падпісваюцца ўпаўнаважанымі службовымі асобамі, завяраюцца пячаткай арганізацыі аховы здароўя і прадастаўляюцца ў банк у арыгінальным выглядзе. 

Вольга Змітровіч растлумачыла, што грамадзяне, якія збіраюць грашовыя сродкі з дапамогай дабрачынных рахункаў, безумоўна, самастойна выбіраюць арганізацыю аховы здароўя для праходжання лячэння. Разлікі за аказаныя медыцынскія паслугі ляжаць у плоскасці грамадзянска-прававых адносін. Арганізацыя аховы здароўя сама ў адпаведнасці з дзейнымі прэйскурантамі фарміруе канчатковы кошт лячэння.

Святлана Тулупава заўважыла, што пры Міністэрстве аховы здароўя працуе камісія па накіраванні грамадзян за мяжу для атрымання лячэння. «У выпадку, калі ў Беларусі пацыенту не могуць аказаць дапамогу, збіраецца камісія Міністэрства аховы здароўя па накіраванні пацыента за мяжу, разглядаюцца дакументы, разглядаюцца ўсе прапановы, якія паступілі. Такія пацыенты за кошт рэспубліканскага бюджэту выязджаюць за межы Беларусі», — сказала яна.

Паводле інфармацыі Міністэрства аховы здароўя, такім чынам за студзень — верасень 2026 года для атрымання медыцынскай дапамогі за мяжу выехалі 100 чалавек, з іх 36 — дзеці. 

Адказваючы на пытанне, ці можа чалавек сам выбіраць лекі для лячэння за кошт сабраных сродкаў, Святлана Тулупава падкрэсліла пазіцыю Міністэрства аховы здароўя, якая заключаецца ў тым, што ўсе лекавыя прэпараты павінны быць назначаны ўрачом або ўрачэбным кансіліумам. 

«Безумоўна, пацыенты цяпер вельмі інфармаваныя, чытаюць, бачаць новыя прэпараты. Але часта гэтыя прэпараты не з'яўляюцца эфектыўнымі і бяспечнымі для пацыента. Прэпарат, які назначаны ўрачом або ўрачэбным кансіліумам, — гэта прэпарат з даказанай эфектыўнасцю і бяспекай, яго можна выкарыстоўваць на тэрыторыі Беларусі», — адзначыла яна, указаўшы на адпаведнасць такіх прэпаратаў клінічным пратаколам.