На поўначы Партугаліі зафіксавана рэдкая анамалія надвор’я — воблака ў форме доўгага вала, якое нагадвае гіганцкую хвалю. Атмасферную з’яву назіралі адпачывальнікі на пляжах у Павоа-дэ-Варзін, Віла-ду-Кондзі, Фігейра-да-Фош і Авары, дзе яно выклікала здзіўленне і нават кароткачасовую трывогу.
Рулоннае воблака (volutus) — рэдкі тып аблокаў, якія ўяўляюць сабой доўгую, гарызантальна выцягнутую цыліндрычную масу, аддзеленую ад іншых аблокаў. Па словах спецыялістаў метэаплатформы Meteo Trás-os-Montes, гэта гарызантальна выцягнутае, трубчастае воблака фарміруецца пры сутыкненні цёплага паветра з халодным паблізу марскога ўзбярэжжа. У адрозненне ад іншых аблокаў, яно не паднімаецца ўверх, а «рассцілаецца» у шырыню. Візуальна яно нагадвае грэбень вялізнай хвалі.
Хоць у Партугаліі такія аблокі фіксуюцца нячаста, гэтае не першае іх з’яўленне. У 1999 годзе падобны выпадак быў адзначаны на поўдні краіны, у Алгарве, дзе воблака выклікала паніку — людзі прынялі яго за цунамі і ў спешцы пакінулі пляжы.
Рэгулярна «аблокі-ролы» можна назіраць толькі ў адным рэгіёне свету — на поўдні заліва Карпентарыя ў Аўстраліі. Там яны вядомыя пад назвай «morning glory cloud» і ўзнікаюць з прадказальнай частатой дзякуючы асаблівасцям клімату і рэльефу.
