У 12.45 па мінскім часе ў Лівіньё стартуе кваліфікацыя ў лыжнай акрабатыцы сярод жанчын. Удзел у адборачным турніры прымуць 25 фрыстайлістак, у тым ліку нашы Ганна Гуськова, Ганна Дзяруга і Анастасія Андрыянава, а таксама пераможца Гульняў-2022 кітаянка Сю Меньтаа і дзеючая чэмпіёнка свету з ЗША Кайла Кун. Па выніках першага раўнда наўпрост у фінал пройдзе лепшая шасцёрка. Астатнія 19 дзяўчат выступяць у другім крузе, дзе разыграюць яшчэ шэсць пуцёвак у вырашальны старт. Такім чынам, фінал 18 лютага збярэ 12 спартсменак.

У мінулым сезоне Кубка свету беларускі выступілі на трох этапах. Ганна Гуськова тройчы заняла дзявятае месца, Ганна Дзяруга ўсе тры старты скончыла ў топ-20, а найлепшым вынікам Анастасіі Андрыянавай аказалася 14-я пазіцыя. На зімовых Алімпійскіх гульнях 2022 года ў Пекіне Дзяруга стала 24-й, Андрыянава-12-й. Гуськова чатырма гадамі раней заваявала серабро, а восем гадоў таму ў Пхёнчхане паднялася на вышэйшую прыступку п’едэстала.

У 20.45 у Мілане пачнецца кароткая праграма ў жаночым адзіночным катанні, першай на лёд выйдзе наша Вікторыя Сафонава. У адвольную праграму, якая пройдзе 19 лютага, адбяруцца 24 наймацнейшыя спартсменкі. У мінулым верасні Беларуская фігурыстка стала чацвёртай на кваліфікацыйным турніры ў Пекіне, а на Алімпіядзе чатыры гады таму была 12-й. 

Усяго ў спісе ўдзельніц 29 дзяўчат, сярод іх чэмпіёнка Расіі Адэлія Петрасян, трохразовая чэмпіёнка свету і прызёр Гульняў-2022 з Японіі Каору Сакамота, а таксама дзеючая пераможца Сусветнага форуму амерыканка Аліса Лю.